अख्तियारको पत्र लुकाउने स्वास्थ्यका कर्मचारीमाथि कारवाही हुन्छ: बोहोरा

हेल्थ टुडे

काठमाडौं, २ पुष: स्वास्थ्य मन्त्री दीपक बोहोराले अख्तियार दुरुपयोग अनुसन्धान आयोगले दोषी ठहर गरेर कारवाहीकालागि स्वास्थ्य मन्त्रालयलाई पठाएको पत्र गायव गर्ने स्वास्थ्य मन्त्रालयका कर्मचारीलाई कारवाही गरिने बताएका छन् ।

स्वास्थ्य मन्त्रालयमा सोमबार आयोजित पत्रकार भेटघाटमा मन्त्री बोहोराले सञ्चारकर्मिको प्रश्नको जवाफ दिदै आफूलाई समेत अख्तियारको कारवाही पत्रका बिषयमा जानकारी नभएको बताउदै यस बिषयमा सोधखोज गरि पत्र लुकाउने र कारवाहीका लागि सिफारिस गरिएका चिकित्सक, स्वास्थ्यकर्मि र कर्मचारीलाई कारवाही गरिने प्रतिवद्घता व्यक्त गरे । अख्तियार दुरुपयोग अनुसन्धान आयोगले प्रसूति गृहको निर्देशक हुदा २ करोड बढी रकममा अनियमितता गरेको लगायतका बिषयमा दोषी ठहर गरेर प्रसूति गृहकी तत्कालिन निर्देशक डा. पुष्पा चौधरी सहित प्रसूति गृहका पाँच कर्मचारीलाई कारवाही स्वास्थ्य मन्त्रालयलाई गत असार २ गते पत्र पठाएको थियो । डा.चौधरीसँगै कारवाहीका लागि सिफारिस भएका प्रसूति गृहका तत्कालिन लेखा अधिकृत अमित पौडेल हाल स्वास्थ्य मन्त्रालयमा साखा अधिकृतका रुपमा कार्यरत रहेकाले डा. चौधरीले पौडेलकै सहयोगमा कारवाहीबाट बच्न उक्त पत्र स्वास्थ्य सचिवसम्म पुग्नै नदिएर लुकाएको स्रोतको दाबी छ । स्वास्थ्य मन्त्रालयमा १२ औं तह ( प्रमुख विशेषज्ञ) मा कार्यरत तत्कालिन प्रसूति गृहकी निर्देशक डा.चौधरीको योजना अनुसार अख्तियारको पत्र मन्त्रालयमा गायव गरिएको स्रोतले बताएको छ ।

स्रोतका अनुसार आफूमाथि कारवाही गरिए आफू सचिवको प्रतिस्पर्धाबाट बाहिरिने आशंकाले डा. चौधरीले पत्र लुकाइएको हो । दुई हप्ता अगाडि मात्र सेवा निवृत भएकी स्वास्थ्य मन्त्रालयकी सचिव डा. किरण रेग्मीले अख्तियारको पत्र आफू कहाँ नपुगेको बताएकी छन् । सचिवकी दावेदार डा. चौधरी यस अगाडि पनि एक अन्तर्राष्टिय गैरसरकारी संस्थामा महिनाको १ लाख ५० हजार रुपैया तलव पाउने गरि कार्यक्रम संयोजकका रुपमा नियुक्ती भएपछि दोहोरो तलब भत्ता लिएको भन्दै विवादमा तानिएकी थिइन । डा. चौधरीले भने आफू विरुद्घ षडयन्त्र भइरहेको प्रतिकृया दिदै यस बिषयमा छिट्टै पत्रकार सम्मेलन गरेर यथार्त बाहिर ल्याउने बताइन ।