चौथो अन्तर्राष्ट्रिय योग दिवस देशैभर मनाइदै

हेल्थ टुडे,
काठमाडौं, ७ असारः आज चौथो अन्तर्राष्ट्रिय योग दिवसका अवसरमा देशैभर स्वास्थ्य मन्त्रालय, यसका अन्य अंगहरु, पतञ्जली योगपिठ तथा विभिन्न संघसंस्थाहरुले विभिन्न कार्यक्रम गरी मनाउँदैछन् । देशभर आयोजना भइरहेका योगाभ्यास, रक्तदान तथा अन्तक्रिया लगायतका कार्यक्रममा स्थानीयदेखी मन्त्रीसम्म तथा बालकदेखि वृद्धसम्मको सहभागीता रहेको छ । हरेक उमेर समूह तथा बिरामीका लागि पनि फरकफकर तरिकाबाट योग गर्न सकिने भएकोले पनि यसतर्फ धेरैको आकर्षण बढ्दै गएको छ ।
योगको नियमित अभ्यासबाट स्वास्थ्य राम्रो, कार्यक्षमतामा वृद्धि, चिन्तामुक्त, मानसिक शान्ति, रोग प्रतिरोधी क्षमतामा बढोत्तरी, शरीर, मन र आत्माबीचको समन्वय, सकारात्मक सोचको विकास, अनावश्यक विचारबाट मुक्ति, ऊर्जा प्राप्ति, आत्म ज्ञान प्राप्ति लगायतका सकारात्मक गुणको विकास हुन्छ ।

यसै अवसरमा आज स्वास्थ्य तथा जनसंख्या मन्त्रालय र आयुर्वेद विभागले बिहान ६ बजेबाट स्वास्थ्य सेवा विभाग टेकुबाट सचेतनामुलक र्यालीको संयुक्त रुपमा आयोजना गरेको आयुर्वेद विभागका महानिर्देशक डा वासुदेव उपाध्यायले जानकारी दिनुभयो । र्यालीमा विद्यार्थी, कर्मचारी, सर्वसाधारण लगायतको सहभागिता रहेको थियो ।

त्यसैगरी नेपाल समृद्ध बनाउन सबै नेपाली स्वस्थ हुनुपर्ने र यसका लागि योग महत्वपूर्ण हुने प्रदेश नं २ का प्रदेश प्रमुख रत्नेश्वरलाल कायस्थले बताउनुभएको छ ।
चौथो अन्तर्राष्ट्रिय योग दिवसका अवसरमा भारतीय महावाणिज्य दूतावास वीरगञ्जद्वारा जनकपुरको जानकी मन्दिरमा आज आयोजित योग अभ्यास कार्यक्रममा उहाँले सो कुरा बताउनुभएको हो ।
सो योग कार्यक्रममा प्रदेश नं २ प्रदेश प्रमुख, मुख्यमन्त्री, भारतीय महावाणिज्य दूतावासका कन्सुलर तथा योगगुरु , साधक साधिकाले समेत योग गरेका थिए ।