माइतीघरमा ओपिडी सेवा दिदै प्रर्दशन पनि

हेल्थ टुडे,
काठमाडौं, २९ असारः डा गोविन्द केसीको समर्थनमा आन्दोलनरत डाक्टरहरुले आज माइतीघर मण्डलामा प्रदर्शन गरेका छन् । १४ दिनदेखि जुम्लामा आमरण अनशनरत डा केसीको माग सुनुवाइ गर्न सरकारले चासो नदिएको र जीवन रक्षाका लागि सरकार संवेदनशील नभएको भन्दै डाक्टरहरुले आकस्मिक बाहेकका सेवा बहिस्कार गर्ने घोषणा गरेका हुन् ।
त्रिवि शिक्षण अस्पतालका आवासीय चिकित्सक र इन्टर्न डाक्टरहरुले माइतीघर मण्डलामा प्रदर्शन गरेका हुन् । प्रदर्शनका क्रममा डाक्टरहरुले डा केसीका मागहरु छिट्टै सम्बोधन गर्न सरकारसँग माग गरेका थिए । उनीहरुले शिक्षण अस्पतालमा भने आजदेखि आकस्मिक बाहेकका सेवा ठप्प पारेका छन् ।
प्रदर्शनका क्रममा उनीहरुले माइतीघरमा ओपिडी सेवा समेत दिइएको आवासीय चिकित्सकहरुको संस्था नेशनल रेजिडेन्ट डक्टर्स एसोसिएसनका अध्यक्ष डा सुमित पाण्डेले जानकारी दिनुभएको छ । डा गोविन्द केसीको समर्थनमा आन्दोलनमा उत्रेका डाक्टरहरुले आज माइतीघरमा बिरामी जाँच्ने काम समेत गरिरहेका छन ।
डा सुमित पाण्डेका अनुसार माइतीघरमा १० बजेदेखि ओपिडी सेवा सुरु भएको हो । एसोसिएसनमा ३ सयभन्दा बढी आवासीय चिकित्सक आबद्ध रहेका छन् । सरकारले माइतीघरलाई निषेधित क्षेत्र घोषणा गरे पनि डाक्टरहरुले आज माइतीघरमा ओपिडी सेवा दिदै सरकारको विरोध र डा केसीको समर्थनमा उत्रेका हुन । प्रदर्शनका क्रममा डा केसीका मागहरु छिट्टै सम्बोधन गर्न सरकारसँग माग गरेका छन ।