प्रशासनले दियो १० मिनेटको अल्टिमेटम–डा केसीलाई काठमाडौं लैजान नदिने अडान

हेल्थ टुडे,
जुम्ला, ३ साउनः जुम्लास्थित जिल्ला प्रशासन कार्यालयले अनसनरत प्राध्यापक डा गोविन्द केसीलाई १० मिनेट भित्रमा अस्पतालबाट बाहिर निस्कने समयसिमा दिएको छ । प्रसासनले १० मिनेटभित्र बाहिर नआए बल प्रयोग गरेर भए पनि अस्पतालबाट बाहिर निकाल्ने चेतावनी दिएको हो ।
डा केसीलाई जबरजस्ती काठमाडौं लैजान खोजेपछि स्थानीयले अस्पताल क्षेत्रमा घेराउ गरिरहेका छन् । उनीहरुले डा केसीको माग पुरा गर्नुपर्ने भन्दै डा केसीको समर्थनमा नारा लगाइरहेका छन् भने डा केसीलाई काठमाडौं लैजान नदिने अडान लिएर केसीको समर्थनमा उत्रिएका छन ।
यदि प्रशासनले जबरजस्ती गर्न खोजे प्रतिकार गर्ने स्थानीयले चेतावनी दिएका छन् । बिहान स्थानीय र प्रहरीबिच झडप हुँदा केही स्थानीय घाइते भएका थिए भने एक जना प्रहरीलाई गोली लागेको थियो । गोली लागेका प्रहरीको जुम्लामा उपचार सम्भव नभएपछि काठमाडौं ल्याउन लागिएको छ ।
उता प्रशासनले एउटैं हेलिकोप्टरमा डा केसी र घाइते प्रहरीलाई काठमाडौं ल्याउने तयारी गरेको छ । यसअघि डा. गोविन्द केसीले सरकारले माग पूरा नगरेसम्म काठमाडौं नजाने अडान लिए पनि अस्पतालको क्षति देख्दा आफू बस्न नमिल्ने भन्दै काठमाडौं जान तयार रहेको बताउनुभएको छ । केसीले पत्रकार सम्मेलन गरेर जुम्लाले आफूलाई गरेको सहयोग अविश्मरणीय रहेको भन्दै आफ्नो सत्याग्रह जता गए पनि जारी रहने बताउनुभएको हो ।