एचओटीसीमा दुई वटा मोडुलर अप्रेसन थिएटर

हेल्थ टुडे
मानव अंग प्रत्यारोपण केन्द्र (एचओटीसी) ले दुई वटा अत्याधुनिक मोडुलर अपरेसन थिएटर स्थापना गरेको छ । जटिल किसिमका शल्यक्रिया सहज बनाउन नेपालमै पहिलो पटक अत्याधुनिक मोडुलर अप्रेसन थिएटर स्थापना गरेको हो । अपरेशन थिएटरको एक समारोहबिच स्वास्थ्य मन्त्री गगन थापाले बिहीबार उद्घाटन गरेका छन् । चार वर्षदेखि मिर्गौला प्रत्यारोपण गर्दै आइरहेको एचओटिसीले गत महिना मात्र नेपालमै पहिलो पटक कलेजो प्रत्यारोपण गर्न सफल भएको थियो । कलेजो प्रत्यारोपण सहितका अंग प्रत्यारोपण शल्यक्रियालाई निरन्तरता दिन यी अप्रेसन थिएटरले सहयोग गर्ने छ ।
प्रत्यारोपणलाई आवश्यक पर्ने अत्याधुनिक साधनहरु यस अप्रेसन थिएटरमा उपलब्ध भएकाले कलेजो प्रत्यारोपणमा आउन सक्ने समस्या हल गर्न ठूलो सहयोग मिल्ने केन्द्रका कार्यकारी निर्देशक तथा वरिष्ठ प्रत्यारोपण सर्जन डा. पुकारचन्द्र श्रेष्ठले बताए । अप्रेसन थिएटर स्थापनाले केन्द्र प्राविधिक रुपमा आत्मनिर्भर भएको उनको जानकारी गराए । केन्द्रले छोटो समयमै मानव अंग प्रत्यारोपणको क्षेत्रमा गरेको कामको मन्त्री थापाले प्रसंसा गर्दै भविश्यमा यसको विकासका लागि मन्त्रालय सधै सकारात्मक भएको बताए । केन्द्रले वर्षेनी १०० भन्दा बढी मृगौला प्रत्यारोपण गर्दै आएको छ । यसका साथै नेपालमा कलेजो प्रत्यारोपणको लागि दक्ष जनशक्ति तथा प्रविधिको विकास गर्दै कलेजो प्रत्यारोपणलाई निरन्तरता दिन आफू लागिरहेको डा श्रेष्ठले बताए ।
मानब अंग प्रत्यारोपण केन्द्रले प्रत्यारोपणसंगै अन्य सेवाहरु पनि विस्तार गर्दै आएको छ । हाल यस केन्द्रमा मृगौला तथा कलेजो प्रत्यारोपणका साथै मृगौला रोग सम्बन्धी परामर्श तथा सम्पूर्ण उपचार, मृगौला प्रत्यारोपण तथा मृगौला दान सम्बन्धी सम्पूर्ण जानकारी, यूरोलोजी सेवा, मुटु रोग तथा पेट सम्बन्धी उपचार, पोषण सम्बन्धी जानकारी तथा अत्याधुनिक रेडियोलोजी र प्याथोलोजी सेवाहरु समेत उपलब्ध छन ।
केन्द्रमा नेपाल मात्र नभई विदेशी मुलूकबाट पनि मृगौला प्रत्यारोपणको लागि आउने विरामीहरुको चाप बढ्दो छ । हप्ताको ७ दिन २४ घण्टा निशुल्क डाइलाइसिस सेवा प्रदान गरिरहेको यस केन्द्रले डाइलाइसिस गर्न आउने विरामीहरुको सहजताका लागि केही दिनमै प्रभातकालिन तथा रात्रीकालिन निशुल्क बस सेवा समेत शुचारु गर्ने भएको छ ।