स्वास्थ्यमा सुदूरपश्चिम उत्कृष्ठ

सुदूरपश्चिमले उत्कृष्ठ स्वास्थ्य सेवा प्रदान गर्ने क्षेत्रको रुपमा आफूलाई उभ्याएको छ । स्वास्थ्य मन्त्रालयको गत वर्ष गरेको मूल्यांकनमा सुदूरपश्चिम सबैभन्दा अब्बल ठहरिएको हो । पाचौ स्वास्थ्य सेवा दिवसका अवसरमा आईतबार स्वास्थ्य मन्त्रालयका आयोजना गरिएको विषेश कार्यक्रममा सुदूरपश्चि क्षेत्रिय निर्देशनालयलाई क्षेत्रिय स्तरको मूल्यांकनमा उत्कृष्ठ सहित अवार्ड प्रदान गरिएको छ । कार्यक्रममा स्वास्थ्य मन्त्री गगनकुमार थापा र स्वास्थ्य सचिव डा. सेनेन्द्र उप्रेतिले निर्देशनालयका निर्देशक डा.सुशील प्याकुरेललाई अवार्ड सहित पुरस्कार प्रदान गरेका हुन ।
त्यसैगरि ७५ जिल्ला जनस्वास्थ्य कार्यालयहरुमध्ये पनि सुदूरपश्चिमकै अछाम जिल्ला जनस्वास्थ्य कार्यालय प्रथम र बैतडी जिल्ला जनस्वास्थ्यले तेश्रो स्थान हासिल गरेको छ । दोश्रो स्थान भने मध्यपश्चिमको सुर्खेतले प्राप्त गरेको छ । मन्त्रालयले जिल्ला जनस्वास्थ्य कार्यालयहरुले प्रवाह गर्ने सेवाका आधारमा हरेक वर्ष उत्कृष्ठ जिल्लाहरु र क्षेत्रलाई पुरस्कृत गर्ने गरेको छ । स्वास्थ्य मन्त्रालय मातहतको अनुगमन तथा मूल्यांकन महासाखाले देश भरिका जिल्ला जनस्वास्थ्य कार्यालयहरुले प्रदान गरिरहेको सेवाका बिषयमा गोप्य तरिकाले मूल्यांकन गरेको थियो । सुदूरपश्चिमका केही जिल्ला अस्पताल र प्राथमिक स्वास्थ्य केन्द्रमा अझै पनि दरबन्दी अनुसार चिकित्सक र स्वास्थ्यकर्मी पुग्न नसकेको भए पनि पहिलेको भन्दा यहाँको सरकारी स्वास्थ्य सेवामा सुधार आएको विज्ञहरु बताउँछन । यसै गरि स्वास्थ्य सेवा दिवसको अवसरमा आयोजित कार्यक्रममा स्वास्थ्य मन्त्री थापाले आफूले शरीरका सबै अंग दान गरेको इच्छा पत्रमा हस्ताक्षर गरेका छन् । यो भन्दा पहिले पूर्व स्वास्थ्य मन्त्री डा. उपेन्द्र देवकोटा र राजेन्द्र महतोले पनि अंग दान गरेको इच्छापत्रमा हस्ताक्षर गरिसकेका छन् ।