रुट क्यानलमा अब्बल जोडी

डा.सुमन गौतम र डा.आशा थापा परिचित दन्त रोग विशेषज्ञमात्र नभएर असल दम्पती हुन् । डा.सुमन नेपाल मेडिकल कलेज जोरपाटीमा आबद्घ छन् भने आशा वीर अस्पतालको डेन्टल विभागमा । डा.सुमनले धरानको बीपी कोइराला स्वास्थ्य विज्ञान प्रतिष्ठानबाट पहिलो ब्याचमा र डा. आशाले मणिपाल कलेज अफ डेन्टल साईन्सेस, मणिपालबाट बीडीएस (ब्याचलर्स अफ डेन्टल सर्जरी) उत्तीर्ण गरेकी हुन् । बीडीएसपछि केही वर्ष काम गरे दुवैले । काठमाडौं विश्वविद्यालयबाट विशेषज्ञता अर्थात एमडीएस (मास्टर्स इन् डेन्टल सर्जरी) गर्ने बेला दुवैबीच आपसमा चिनजान भयो । पछि दुवैका परिवारको सहमतिमा विवाहबन्धनमा बाँधिए । मास्टर्स पढ्दापढ्दै झांगिएको प्रेम पढाइ सकेपछि सन् २०११ मा विवाह भयो । अहिले उनीहरूको एक छोरा छ ।
डा.सुमनले न ेपाल मेडिकल कलेजबाट र डा.आशाले वीर अस्पतालबाट बचेको समय पाटन अस्पताल अगाडि रहेको ललितपुर मलको चौथौ तलामा रहेको रुट क्यानल सेन्टरमा उपचार गर्छन् । पढाइ सकेर काम सुरु गरेदेखि नै दाँतको उपचारमा नयाँ प्रविधि भित्र्याउनुपर्छ भन्ने दुवैलाई लागेको थियो । दुवैले सल्लाह गरे, परम्परागत विधिभन्दा आधुनिक विधिमार्फत किन सेवा नदिने ? तर त्यो प्रविधिमा केही कठिनाइ र चुनौती दुवै थिए । तर यो जोडी चुनौती र कठिनाइ दुवै मोल्न तयार भयो । दुवैले चुनौतीको सामना गरौं भन्ने सल्लाह भएपछि उनीहरूले माइक्रोस्कोपमार्फत उपचार गर्ने प्रविधि ‘डेन्टल अपरेटिङ माइक्रोस्कोप’ एक वर्ष अगाडि मात्र भित्र्याएका हुन् । यो प्रविधि नेपालमा आफूहरूले पहिलो पटक नेपाल भित्र्याएको उनीहरूको दाबी छ । नयाँ प्रविधिका विषयमा धेरैजना जानकार छैनन् । त्यसैले अहिले पनि धेरैजसो परम्परागत विधिमार्फत नै रुट क्यानल भइरहेको डा. आशा बताउँछिन् ।
उनी भन्छिन्, ‘डेन्टल अपरेटिङ माइक्रोस्कोप हामीले हाम्रो सुविधाका लागि मात्र ल्याएका होइनौं । बिरामीले विश्वसनीय, अन्तर्राष्टिय स्तरको सेवा नेपालमै पाउनुपर्छ भन्ने अभिप्रायले चुनौती मोलेर यो प्रविधि ल्याएका हौं । यो कुरा सबैले बुझिदिनु प¥यो ।’
दन्त चिकित्सकको भीडमा डा.सुमन र डा.आशा दम्पती केही पृथक् छन् । दुवैजना आफ्नो विज्ञता भन्दा बाहिर गएर उपचार गर्दैनन् । डा.आशा भन्छिन्, “बिरामीको सन्तुष्टि नै हाम्रो सन्तुष्टि हो । नेपालमै स्तरीय र आधुनिक प्रविधिमार्फत सेवा दिन पाएकामा गर्व लाग्छ । ’
आफ्नो पेसाबाट दुवैजना सन्तुष्ट रहेको बताउँछन् । डा. सुमन भन्छन्, ‘आफूले विज्ञता हासिल गरेको विषयमा निखार ल्याउँदै नयाँ प्रविधिमा जोड दिनुपर्छ । सबै मिलेर नेपालको दन्त सेवालाई माथि उठाउनुपर्छ ।’
हेल्थ टुडे