विश्व मिर्गौला दिवसमा ‘ किड्नी वाक ’

विश्व मिर्गौला दिवसको अवसरमा राजधानीमा बिहीबार चेतनामूलक ‘ किड्नी वाक ’ आयोजना गरिएको छ । नेपाल किड्नी फाउण्डेसन र पाटन प्याथल्यावको संयुक्त आयोजनामा भएको र्यालीको दरबारमार्गमा स्वास्थ्य मन्त्री गगन थापाले उद्घाटन गरेका थिए । कार्यक्रममा मन्त्री थापाले मिर्गौला रोगीको उपचारमा सरकारले मस्तिष्क मृत्यु कानून पास लगायत निशुल्क डायलासिस र आउदो बैसाखदेखि प्रत्यारोपण समेत निशुल्क गर्ने गृह कार्य गरिरहेको जानकारी दिदै अब मिर्गौला फेल हुनै नदिने अभियानमा लाग्न सबैलाई आग्रह गरे । पूर्व निर्वाचन आयुक्त निलकण्ठ उप्रेतिले मन्त्री थापालाई सफल स्वास्थ्य मन्त्रीको संज्ञा दिदै स्वस्थ्य समाज निर्माणको अभियान जारी राख्ने बताए । कलाकार दीपाश्री निरौलाले मिर्गौला रोग सम्बन्धि जनचेतना जगाउने काममा आफू लागिरहने प्रतिवद्घता व्यक्त गरिन । पाटन प्याथल्यावका कार्यकारी निर्देशक रेसम भट्टराईले रोगलागे पछि उपचार गराउनु भन्दा किड्नी फेल हुने अवस्था नै आउन नदिने जनचेतनामूलक कार्यक्रम आयोजना गरिएको बताए । नेपाल किड्नी फाउण्डेसनका अध्यक्ष डा. शक्ति बस्नेतले मिर्गौला फेल हुनबाट जोगाउन पानी प्रसस्त पिउने, जथाभावी एन्टिवायोटिक सेवन नगर्ने, दैनिक अभ्यास गर्ने, मोटोपन कम गर्ने जस्ता जिवनशैली परिवर्तन आवश्यक रहेको बताए । दरवारमाट सुरु भएको र्यालीले राजधानीका विभिन्न भागको परिक्रमा गरेको थियो ।