नेपालमा झुण्डिएर आत्महत्या गर्नेको संख्या सबै भन्दा बढी रहेको पाइएको छ । दी स्कुल अफ साइकलोजी नेपालले विश्व आत्महत्या रोकथाम दिवसका अवसरमा आईतबार राजधानीमा आयोजना गरेको पत्रकार अन्तरक्रियामा सरोकारवाला निकायले उक्त जानकारी दिएका हुन् । नेपालमा एक दशकको अवधिमा पाँच हजारले आत्महत्या गरेको तथ्यांक प्रस्तुत गर्दै मनोविज्ञानविज्ञ डा. वियज ज्ञवालीले आत्महत्या गरेका पाँच हजार मध्ये सबैभन्दा बढी तीनहजार ८२ झुण्डिएर आत्महत्या गरेको पाइएको बताए ।
झुण्डिएर आत्महत्या पछि बीस सेवन गर्ने रहेको तथ्यांक छ । बीस सेवनका कारण आत्महत्या गर्नेको संख्या एकहजार तीनसय ९ रहेका छ । बेरोजगारी, राजनीतिक असफलता, परीक्षामा फेल, सेयर लगानीमा घाटा, महिला हिंसा लगायतका कारणले आत्महत्या गर्नेको संख्या बढी रहेको पाइएको दी स्कुल अफ साइकलोजीका संस्थापक डा. नरेन्द्रसिह ठगुन्नाले प्रतिवर्ष १६ प्रतिसत मृत्युको कारण आत्महत्या रहेकाले नेपाल आत्महत्या रोक्न सरकारले व्यापक जनचेतनामूलक कार्यक्रम सञ्चालन गर्नु पर्ने बताए । मनोविज्ञानका अध्यापक पदमराज जोशीले आत्महत्या रोकथाममा मिडियाको भूमिका महत्वपूर्ण हुने भएकाले समाचार सम्प्रेषणमा ध्यान दिनु पर्ने आवश्यकता औल्याए ।
कार्यक्रममा विभिन्न कवि र कवियत्रिहरुले आत्महत्या रोकथामका बिषयमा कविता बाचन गरेका थिए । हरेक वर्ष सेप्टेम्बर १० लाई विश्व आत्महत्या विरुद्घ दिवसको रुपमा मनाइने गरिन्छ ।
Leave a Reply