अब बसपार्कमै स्वास्थ्य जाचको सुविधा  

हेल्थ टुडे

काठमाडौं  : काम बिशेषले तपाईं काठमाडौको गंगबूस्थित नयाँबसपार्क हुँदै लामो दूरीको यात्रा गर्दै हुनुहुन्छ ? सबै यात्रुका लागि खुशीको कुरा । तपाईलाई घर जादा सन्चो छैन भने बसपार्कमै आफ्नो स्वास्थ्य अवस्था जाँचेरै जानुस् । यसका लागि छुट्टै खर्च लाग्दैन । नयाँ बसपार्क निर्माण, व्यवस्थापन र सञ्चालनको जिम्मा लिएको लोत्से बहुउद्देश्यीय प्रालिले नयाँ बसपार्कमा स्वास्थ्य परामर्श स्वास्थ्य केन्द्र (क्लिनिक) को स्थापना गरेर यात्रुहरुलाई थप सुविधा प्रदान गरेको छ । उक्त क्लिनिक बुधबारबाट सञ्चालनमा आएको छ ।

काठमाडौं महानगरपालिकाका मेयर विद्यासुन्दर शाक्यले यो सेवा केन्द्रको सुभारम्भ गरेका छन् । शाक्यले केन्द्र स्थापनाले काठमाडौं भित्रिने र बाहिरिने यात्रुले आफ्नो स्वास्थ्यबारे परामर्श गर्न पाउने भन्दै खुशी व्यक्त गरे ।  केन्द्रमा ग्रान्डी इन्टरनेशनल हस्पिटलका स्वास्थ्यकर्मीले समान्य स्वास्थ्य सेवा दिनेछन । सेवा विहान ६ देखि साझ ६ बजेसम्म खुल्ला रहने छ । यो सेवा केन्द्रमा प्रेसर तथा सुगर चेकजाँच गर्न सकिनेछ । समान्य खालका चोटपटकको प्राथमिक उपचार सेवा पनि केन्द्रले प्रदान गर्ने छ । सामान्य ज्वरो, रुघाखोकीको औषधि  पनि यात्रुले लिन पाउनेछन् । केन्द्रबाट सामान्य स्वास्थ्य समस्याका औषधी पनि निःशुल्क दिने व्यवस्था गरिएको लोत्से बहुउद्देश्यीय प्रालिका अध्यक्ष दीपक कुँवरले बताए । केन्द्रमा आउने बिरामीलाई ग्लुकोज, पेन किलर लगायतका औषधी पनि निःशुल्क दिइनेछ । केन्द्रमा आकस्मिक रुपमा बिरामीलाई अस्पतालसम्म लैजान एम्बुलेन्सको व्यवस्था पनि गरिएको कुवरले बताए ।