स्वास्थ्यका नियुक्ती पनि खारेज हुन्छन : पण्डित

हेल्थ टुडे

काठमाडौं, ५ फागुन : नव नियुक्त जनसंख्या तथा वातावरण मन्त्री लालबाबु पण्डितले निर्वाचन सम्पन्न भएपछि निवर्तमान सरकारले गरेका नियुक्ती र निर्णय खारेज हुने बताएका छन् । स्वास्थ्य मन्त्रालयमा भएका महत्वपूर्ण नियुक्ती समेत वर्तमान सरकारले खारेज गर्ने उनको बताएका हुन । शनिबार सञ्चारकर्मिहरुसँग कुरा गर्दै मन्त्री पण्डितले नियम कानून भन्दा बाहिर गएर आर्थिक प्रलोभनमा परेर गरिएका सचिवसहितका नियुक्ती खारेज गरिने दाबी गरेका हुन ।

सरकारले चाडै पूर्णता पाउने र स्वास्थ्य लगायतका सबै मन्त्रालयमा गरिएका नियुक्तीको बैधानिकता अध्ययन गरेर खारेज गरिने उनले जानकारी दिए । स्वास्थ्य मन्त्रालयमा आर्थिक चलखेल गरेर निवर्तमान स्वास्थ्य मन्त्री दीपक बोहोराले मन्त्रालयको सचिव देखि सरकार छोड्ने दिन समेत स्वास्थ्य सेवा विभागमा नयाँ निर्देशक नियुक्त गरेका थिए । बोहोराले आर्थिक लेनदेनकै आधारमा अख्यितारले कारावाहीका लागि सिफारिस गरेकी विवादास्पद् डा. पुष्पा चौधरीलाई पुष १३ गते स्वास्थ्य मन्त्रालयको सचिवमा नियुक्त गरेका थिए । त्यसैगरि उनले पुष ३० गते स्वास्थ्य सेवा विभागको महानिर्देशकबाट डा. राजेन्द्र पन्तलाई हटाएर डा. तारा पौडेललाई नियुक्त गरेका थिए । मन्त्री बाहोराको निर्णयलाई चुनौति दिदै डा. पन्त पुनर्वहालीको माग गर्दै अदालत गए पछि सर्वोच्चले पन्तका पक्षमा फैसला दिएको थियो । अदालतको फैसलालाई समेत चुनौति दिदै डा. पन्तलाई पुनर्वहालीको पत्र दिएको दुई दिनमा स्वास्थ्य सचिव डा. चौधरीको सल्लाहमा मन्त्री बोहोराले डा. विनोदमान श्रेष्ठलाई विभागको महानिर्देशक बनाउने निर्णय गरेका थिए । बोहोराले मन्त्रालय मातहतका निकायमा सरुवा आतंकनै मच्याएका थिए । प्रधानमन्त्री केपी ओलीले पनि कानून विपरित र विवादास्पद निर्णय खारेज गरिने बताउदै आएका छन् ।