जति बढी बच्चा जन्मायो, उति बढी प्रोत्साहन रकम

इलाम, १ चैत : इलाम नगरपालिकामा जति बढी बच्चा जन्मायो उति बढी प्रोत्साहन रकम पाइने भएको छ ।आगामी २० वर्षभित्र यस नगरपालिकालाई उपमहानगरपालिकामा स्तरोन्नति गर्ने उद्देश्यसहित जनगणना वृद्धि गर्न यस्तो नियम बनाइएको हो ।यस निर्णयले नगरको जनसंख्या वृद्धि गर्ने योजना अघि बढेको छ । जसअन्तर्गत इलाम नगरकार्यपालिकाको बैठकले सुत्केरीलाई उपलब्ध गराउँदै आएको पोषण सुविधामा परिमार्जन गरेको छ ।नगरभित्रका दोस्रो पटक बच्चा जन्माउने सुत्केरीलाई रु दुई हजार, तेस्रो बच्चा जन्माउने सुत्केरीलाई रु तीन हजार, चौथो पटक बच्चा जन्माउने सुत्केरीलाई रु चार हजार र पाँचौँ पटक तथा सोभन्दा माथि बच्चा जन्माउने सुत्केरीलाई रु पाँच हजार पोषण सुविधा नगद नै दिने निर्णय गरेको छ ।

यसका साथै इलाम नगरपालिकाले पारित गरेको इलाम नगरपालिका कर्मचारी व्यवस्थापन ऐन र शिक्षा नियमावलीमा समेत कर्मचारी तथा शिक्षक–शिक्षिकाले जति पटक बच्चा जन्माए पनि उसले पाउने सुविधामा कुनै कटौती नगर्ने भएको छ ।दुई पटकसम्म मात्र बच्चा जन्माउने महिला कर्मचारी र शिक्षिकालाई सरकारी सेवा सुविधा दिने कानुनी व्यवस्था छ ।नगरपालिकाका प्रमुख महेश बस्नेतले इलाम नगरको जनसंख्या पलायन हुँदै गएको र त्यसबाट नगरको चहलपहल घट्ने भएकाले जनसंख्या वृद्धि गर्न नगरपालिका लागिपरेको बताउनुभयो । उहाँले भन्नुभयो, “जनसंख्या समस्या होइन, स्रोतको उचित व्यवस्थापन गर्न नसक्नु समस्या हो, यसलाई परिचालन गर्न सक्नुपर्छ ।”

धेरै जनसंख्या भएमा नगरको व्यापारिक, सामाजिक र सांस्कृतिक गतिविधि बढ्ने र यसलाई परिचालन गरी नगरमा विभिन्न सेवा सुविधा थप्न सकिने प्रमुख बस्नेतले बताउनुभयो ।साविक इलाम नगरपालिकामा सन् २०११ मा कुल १८ हजार ६३३ जनसंख्या रहेकोमा सन् २०१५ मा १९ हजार ७१२ रहेको बताइएको छ । हाल पुनःसंरचनापछि यहाँ बरबोटे, सुम्वेक, साखेजुङ, सोयाक, पुवामझुवा, सोयाक, गोदक, साङ्रुम्बालगायतका गाविससमेत मिसाइएको छ । तर पनि यहाँको जनसंख्या ४८ हजार ५३६ मात्र रहेकाले उपलब्धि हुन नसक्ने प्रमुख बस्नेतको भनाइ छ ।नगरपालिकाको यस निर्णयको मिश्रित टिप्पणी हुन थालेको छ । यस निर्णयले गरीबलाई झनै गरीब बनाउने नगरवासीको भनाइ छ । स्वास्थ्य, शिक्षा, खानेपानी, विकासका पूर्वाधारलगायतमा इलाम नगरपालिका अझै कमजोर मानिन्छ ।यो निर्णय कार्यान्वयन नगराउन नगरवासीले मागसमेत गर्न थालेका छन् ।