डा. नुतन शर्मासंग प्रहरीले लियो बयान

हेल्थ टुडे,
काठमाडौं, २४ साउन : बीएण्डबी अस्पतालमा एक किशोरीको डिम्ब निकालिएको घटनाको अनुसन्धान गर्ने क्रममा प्रहरीले स्त्रीरोग, प्रसूति एवं टुस्टट्युव बेबी विज्ञ डा.नुतन शर्मासँग बयान लिएको छ ।
डा.शर्माको संलग्नता देखिएपछि ललितपुर प्रहरीले उनीमाथि अनुसन्धान गरिरहेको छ । किशोरीलाई ३० हजार रकम दिएर अण्डा निकालिएको र बिरामी भएपछि परिवारले थाहा पाएको अनुसन्धानमा संलग्न अधिकृतहरूले बताएका छन् ।
असार १४ मा ग्वार्कोस्थित बिएण्डबी अस्पतालको आइभिएफ सेन्टरमा १७ वर्षीया किशोरीको डिम्ब निकालिएको आरोप छ । सो घटनामा डा. शर्माको संलग्नता देखिएपछि ललितपुर प्रहरीले उनीमाथि अनुसन्धान गरिरहेको छ ।
डा.शर्माको बयान लिएर हाजिर जमानीमा रिहा गरिएको ललितपुरका एसएसपी तुलबहादुर कार्कीले जानकारी दिए । किशोरीको अण्डा निकाल्ने चिकित्सक र बिचौलियाबारे अनुसन्धान गर्न माग गर्दै साउन १ मा पीडित परिवारले जिल्ला प्रहरी परिसर ललितपुरमा जाहेरी दिएका थिए । डा.शर्मामाथि अनुसन्धान जारी रहेको एसएसपी काकीले बताए । उनले भने– ‘सरकारी वकिल कार्यालयको सहमतिमा उहाँलाई हाजिर जमानीमा राखेर अनुसन्धान गरिरहेका छौँ ।’ यसअघि प्रहरीले लमजुङ घर भएर इमाडोलमा व्युटिसियनको काम गर्दै आएकी राधिका गोतामेलाई पक्राउ गरेको थियो । उनलाई पनि हाजिर जमानीमा राखिएको छ ।
डा.शर्मालाई पक्राउ गर्न प्रहरीले यसअघि अदालतसँग दुई पटक अनुमति मागेको थियो । तर, अदालतले अनुमति नदिएपछि सरकारी वकिलले बिचौलिया राधिका गोतामेलाई पनि हाजिर जमानीमा राखेर थप प्रमाण जुटाउन प्रहरीलाई निर्देशन दिएको हो ।