अर्याललाई स्वास्थ्य राज्यमन्त्रीको जिम्मेवारी

हेल्थ टुडे,

काठमाडौं, २ चैत : स्वास्थ्य राज्यमन्त्रीमा पद्मा अर्याल नियुक्त भएकी छन् । प्रधानमन्त्री केपी ओलीले शुक्रबार गरेको तेश्रो पटकको मन्त्रीमण्डल बिस्तारमा उनलाई स्वास्थ्य राज्यमन्त्रीको जिम्मेवारी दिइएको हो । अर्याल एमालेको तर्फबाट स्याङ्जा २ बाट प्रतिनिधि सभा सदस्यमा बिजयी भएकी थिइन । एमाले र एमाओवादीबाट गरि शुक्रबार ११ मन्त्री र ३ राज्यमन्त्री गरि १४ जना थप गरेको हो ।  ओलीले मन्त्रीमण्डल गठनमा ढिलाई गर्दा स्वास्थ्य मन्त्रालय गत एक महिनादेखि मन्त्री बिहीन थियो । प्रधानमन्त्री ओलीले संघिय समाजवादी फोरम र राष्ट्रिय जनता पार्टीलाई समेत सरकारमा सामेल गराउने तयारी गरे पनि शुक्रबार ती पार्टीबाट प्रतिनिधित्व गर्ने मन्त्रीको टुंगो लगाउन नसक्दा सपत गराउन सकेनन । एमाले र एमाओवादी केन्द्रबिच मन्त्रालय भागबण्डामा स्वास्थ्य मन्त्रालय एमालेको भागमा परेको थियो । तर मधेश केन्द्रित दलहरुलाई पनि सरकारमा सहभागी गराउने प्रयास भएपछि एमाले स्वास्थ्य मन्त्रालय छोड्न तयार भएको थियो ।  स्वास्थ्य मन्त्रालयको जिम्मेवारी संघिय समाजवादी फोरम र राजपा मध्ये एकलाई दिने तयारी ओलीले गरेका थिए । संघिय समाजवादी फोरम र राजपामध्ये एकले स्वास्थ्य र अर्कोले सहरी विकास दिने मोटामोटी सहमती भएको थियो । तर  कुरा नमिलेपछि ओलीले एमालेकी अर्याललाई राज्यमन्त्रीमा नियुक्त गरेका थिए । स्रोतका अनुसार फोरम र राजपा सरकारमा आए उनीहरुमध्ये एकलाई स्वास्थ्य मन्त्री दिएर राज्यमन्त्री अर्यालको जिम्मेवारी हेरफेर गर्न सकिने छ ।