जीविकोपार्जन भत्तामा पुनर्विचार हुने

हेल्थ टुडे,

काठमाडौं, १६ चैत : अघिल्लो सरकारले क्यान्सर,मुटुरोगी र स्पाइन इन्जुरीका लागि दिन थालेको मासिक पाँच हजारको जीविकोपार्जन भत्तामा पुनर्बिचार गर्ने भएको छ । सरकारले शुक्रबार जारी गरेको श्वेतपत्रमा मन्त्रिपरिषद्बाट भएको यस्तो निर्णय सामाजिक न्यायका दृष्टिले उपयुक्त भए पनि बजेटमार्फत संसदबाट पारित गराएर लागु गर्नुपर्नेमा मनोगत ढंगले गरिएको उल्लेख छ । अघिल्लो सरकारका स्वास्थ्यमन्त्री दीपक बोहोराको प्रस्तावमा जीविकोपार्जन भत्ता दिने निर्णय मन्त्रीपरिषद्बाट भएको थियो । यो निर्णयपछि अर्थमन्त्रालयले १ अर्ब भन्दा बढी दायित्व थपिने भन्दै रकम निकासा गर्न अस्विकार गरेको थियो ।   तर स्वास्थ्यमन्त्री बोहोरा अर्थमन्त्रालयमै ढुकेर रकम निकासाका लागि दबाब दिएका थिए । उनको दबाबका बाबजुद अर्थका अधिकारीले रकम निकासा गर्न अस्विकार गरेका थिए । अन्तिममा अर्थले स्वास्थ्य मन्त्रालयकै बजेटबाट रकमान्तर गरेर पहिलो किस्ता उपलब्ध गराएको थियो । यो रकम निकासा हुनेवित्तिकै तात्कालिन प्रधानमन्त्री शेरबहादुर देउवा र स्वास्थ्यमन्त्री बोहोराले वीर अस्पताल पुगेर पाँच हजारको जीविकोपार्जन भत्ता वितरणको शुभारम्भ गरेका थिए ।