मालश्री काफ्लेको स्मृतिमा भागवत गीता प्रवचन र योगा

हेल्थ टुडे,

काठमाडौं, २० चैत : स्वर्गिय मालश्री काफ्लेको स्मृतिमा मंगलबार राजधानीमा भागवत गीताको माध्यमबाट जीवन उत्कृष्ठ बनाउने विधिका बिषयमा प्रवचन र योगा कार्यक्रम गरिएको छ । मालश्री मेमोरियल ट्रष्टको आयोजना तथा म्याग्नस फर्मास्विटिकल्सको सहयोगमा पर्यटन विकास बोर्डको सभाहलमा जीवन विज्ञानका संस्थापक एलपी भानु शर्माले भागवत गीताको माध्यमबाट जीवनलाई कसरी उत्कृष्ठ बनाउन सकिन्छ ? भन्ने बिषयमा स्वास्थ्यकर्मिहरुलाई प्रवचन दिएका थिए । कर्म, ज्ञान र प्रेमका माध्यमबाट जीवनमा उत्कृष्ठता ल्याउन सकिने आध्यात्मिक आधार प्रस्तुत गर्दै शर्माले सच्चा कर्ममा विश्वास गर्नु पर्नेमा जोड दिए । विश्व स्वास्थ्य संगठनले सन् २०३० सम्म विश्वको कूल जनसंख्याको ४५ प्रतिसतमा तनाव हुने आकलन गरेको तथ्यांक स्मरण गराउदै योगको माध्यमबाट धेरै हदसम्म तनाव कम गर्न सकिने शर्माले दावी गरे ।

वरिष्ठ मिर्गौला रोग विशेषज्ञ एवं राष्ट्रिय मिर्गौला उपचार केन्द्रका कार्यकारी निर्देशक डा. ऋषिकुमार काफ्लेले ज्ञान र विज्ञानको समिश्रणले जीवनलाई सार्थक बनाउन सकिने बताए । एक हप्ताको योग र भागवत गीता प्रवचनले व्यक्तिको आध्यात्मिक ज्ञानमा मात्र नभएर स्वास्थ्यमा समेत ठूलो परिवर्तन ल्याएको अध्ययनले देखाएको डा. काफ्ले दाबी गरे । राष्ट्रिय मिर्गौला उपचार केन्द्र, सम्यक डाइग्नोस्टिक,मालश्री काफ्ले मेमोरियल ट्रष्ट र सुमेरु हस्पिटलको संयुक्त प्रयासमा ४३ जनामा योग अगाडि र पछाडिको स्वास्थ्य समस्याका बिषयमा अध्ययन गरिएको थियो । क्यान्सर रोग विशेषज्ञ डा. नविन बस्नेतका अनुसार योग गर्नु भन्दा पहिले ती ४३ जनाको जीवनको दृष्किोण, हृदयको गति, उच्चरक्त चाप, ब्लड सुगर, कोर्टिसोल, किड्नी फङ्सन टेष्ट लगायतका जाच गरिएको थियो । एक हप्ताको योगापछि उनीहरुको फेरि उल्लेखित सबै टेष्ट लिएर परिक्षण गर्दा अधिकांशको स्वास्थ्य समस्यामा ठूलो सुधार आएको पाइएको डा. बस्नेतले तथ्यांक प्रस्तुत गरे । उक्त एक हप्ताको योगालाई चक्र विज्ञान सप्ताह नाम दिइएको थियो । ध्यान, योगा र भागवत गीता प्रवचनले व्यक्तिको आध्यात्मिक मात्र नभएर स्वास्थ्यमा पनि सकारात्मक परिवर्तन हुने कुरा चिकित्सा विज्ञानले समेत प्रमाणित गरिसकेकाले स्वस्थ्य रहन यसको अनुसरण गर्न लाभदायक हुने शर्माले बताए ।

कार्यक्रममा मालश्री काफ्ले मेमोरियल ट्रष्टका अध्यक्ष निलिमा काफ्लेले स्वर्गिय मालश्रीको बार्षिकीको उपलक्ष्यमा भागवत गीताको माध्यमबाट जीवनलाई उत्कृष्ठ बनाउने तरिकाका बिषयमा शर्माको प्रवचन व्यवहारिक भएकोमा बताउदै प्रबचन र योगामा सहभागी सबैलाई धन्यवाद दिइन । डा. ऋषिकुमार काफ्ले र निलिमा काफ्ले दम्पतीले स्वर्गिया छोरी मालश्रीको सम्झनामा हरेक वर्ष चैत २० गते विभिन्न समाजिक कार्यक्रम आयोजना गर्दै आइरहेकाछन् । मालश्री मेमोरियल ट्रष्टले रामेछापका दुर्गम ग्रामिण क्षेत्रमा निशुल्क एम्बुलेन्स सेवा र स्वास्थ्य सिविर सञ्चालन गर्दै आइरहेको छ । एमविविएस अध्ययन गर्दै गर्दा मालश्रीको दुर्घटनाका परेर देहान्त भएको थियो । उनको स्मृतिमा डा. काफ्ले दम्पतीले समाजिक र सेवामूलक कार्य गर्दै आइरहेका छन् ।