जिल्ला जनस्वास्थ्य कार्यालय तत्काल खारेज नहुने

हेल्थ टुडे,

काठमाडौं  : जिल्ला जनस्वास्थ्य कार्यालय तत्काल खारेज नहुने भएका छन् । सरकारले नयाँ संरचना अनुसार तत्काल जिल्लामा रहेका जनस्वास्थ्य तथा स्वास्थ्य कार्यालयहरु खारेज नगर्ने तयारी भएको छ । आगामि चैत २८ गतेबाट देशभरका जिल्ला स्वास्थ्य कार्यालय खारेज हुने पहिले निर्णय भएको थियो ।

तर, यसअघि ती कार्यालयहरुबाट हुँदै आइरहेका जनस्वास्थ्यका कार्यक्रमहरु खोप, मातृशिशु स्वास्थ्य, परिवार नियोजनका साधन तथा नि शुल्क औषधि वितरण लगायतमा अवरोध हुने देखिएपछि स्वास्थ्य मन्त्रालयले तत्काल कार्यालय खारेज नगर्ने तयारी गरेको हो । नीति योजना तथा अन्तराष्ट्रिय समन्वय महाशाखाका प्रमुख महेन्द्र श्रेष्ठले नाम फरक भए पनि पुरानै संरचना अनुसार यी कार्यक्रमलाई निरन्तरता दिने तयारी भइरहेको बताएकाछन ।

‘प्रादेशिक संरचना अनुसार ती कार्यालयहरु रहनेछन,’ उनले भने, ‘जनस्वास्थ्यका कुनै पनि काम प्रभावित नहुन भनेर अर्को व्यवस्था नहुन्जेलसम्मका लागि यो तयारी भएको हो । ’ संविधान अनुसार जिल्ला जनस्वास्थ्य तथा स्वास्थ्य कार्यालय खारेज हुने व्यवस्था रहँदा स्वास्थ्यका कर्मचारीहरुमा अन्यौलता थियो । उनीहरुमा स्वास्थ्यका क्षेत्रमा हालसम्म भएका उपलब्धि पनि गुम्ने डर समेत थियो । तर, पछिल्लो निर्णयसँगै अन्योल हटेको छ । जिल्ला जनस्वास्थ्य कार्यालय तत्काल हटाउन नहुने अधिकांश जिल्ला जनस्वास्थ्य प्रमुखहरुले मन्त्रालयलाई सल्लाह दिएका थिए ।