अमेरिकी सहयोगमा निर्मित बाह्रबिसे स्वास्थ्यकेन्द्र हस्तान्तरण

हेल्थ टुडे,

सिन्धुपाल्चोक, ३० जेठ : अमेरिकी सरकारले निर्माण गरिदिएको बाह्रबिसे स्वास्थ्य केन्द्र नेपाल सरकारलाई हस्तान्तरण गरिएको छ । नेपालका लागि अमेरिकी राजदूत अलाइना बी. टेपलेट्जले बुधबार बाह्रबिसेमा आयोजित समारोहमा स्वास्थ्य तथा जनस्ंखा मन्त्री उपेन्द्र यादव र राष्टिय पुनर्निर्माणका प्रमुख कार्यकारी अधिकृत युवराज भूसाललाई संयुक्त रुपमा नवनिर्मित प्राथमिक स्वास्थ्य सेवा केन्द्र हस्तान्तरण गरेकी हुन् । अमेरिकी अन्तर्राष्टिय विकाश नियोग (युएसएआईडी) मार्फत १८ लाख अमेरिकी डलरको लागतमा उक्त स्वास्थ्य केन्द्र निर्माण सम्पन्न भएको हो । १५ शैय्याको उक्त स्वास्थ्य केन्द्रले १२ हजार सर्वसाधारणलाई उपचार सेवा दिने छ ।

हस्तान्तरण कार्यक्रममा अमेरिकी राजदुत टेपलेट्जले २०७२ सालको भूकम्पले क्षति पुर्याएको स्वास्थ्यकेन्द्र निर्माण गरेर नेपाल सरकार र जनताप्रति आफ्नो गहिरो मित्रता प्रदर्शन गर्न पाएकोमा गर्व महसुस भएको बताइन । अमेरिकाले २०७२ को भूकम्पयता भुकम्प प्रतिकार्य तथा पुर्नस्थापनामा १९ करोड अमेरिकी डलर लगानी गरिसकेको अमेरिकी राजदुतावासले जनाएको छ ।