सरकार ’ब्याक’ नहुने, डा केसीलाई काठमाडौं ल्याउन आग्रह

हेल्थ टुडे,
काठमाडौं, २५ असारः प्रधानमन्त्री केपी शर्मा ओलीले डा गोविन्द केसीलाई खाना खुवाएर काठमाडौं ल्याउन चिकित्सकहरुलाई आग्रह गर्नुभएको छ । जुम्लामा अनसनरत डा केसीका माग सम्बोधन र जीवनरक्षाका लागि ध्यानाकर्षण गराउन आइतबार साँझ बालुवाटार पुगेका चिकित्सक संघको टोली समक्ष ओलीले सो कुरा बताउनुभएको हो ।
छलफलका क्रममा प्रधानमन्त्री ओलीले अनसन वा आन्दोलनको चेतावनीका भरमा आफू नथर्किने भन्दै जुम्लामा अनसन बसेका भरमा सरकार ब्याक नहुने अडान लिनुभएको छ । ‘डा केसीलाई खाना खुवाएर काठमाडौं ल्याउनुहोस्, त्यसपछि वार्तामा बसौँला,’ प्रधानमन्त्री ओलीको भनाइ उद्धृत गर्दै संघको टोलीमा सहभागी एक सदस्यले बताउनुभयो ।
कोही व्यक्ति अनसन बसेको भरमा वा आन्दोलनको चेतावनी दिँदैमा म डराउने छैन भन्दै प्रधानमन्त्री ओलीले डा केसी सँग काठमाडौंमा वार्ता गर्ने भन्दै उहाँलाई खाना खुवाएर काठमाडौंमा ल्याउन आग्रह गर्नुभयो ।
यसरी आन्दोलनका भरमा यो गर वा त्यो गर भनेर हामी ब्याक नहुने बताउदै अस्पताल बन्द गर्छु भनेर चेतावनी दिएको भरमा नडराउँने ओलीको भनाइ छ । ‘अस्पतालको सेवा तपाईंहरुले बन्द गर्न पाउनु हुँदैन । कानुनले पनि बन्द गर्न दिँदैन । सरकार त्यसको सामना गर्न तयार छ । कानुन अनुसार अगाडि बढ्छ । म १४ वर्ष जेल बसेको मान्छे हुँ, झुकेर सानो कागजमा हस्ताक्षर गरेको भए चाँडै छुट्थेँ, झुकिनँ, छुटिनँ । त्यसकारण अहिले पनि झुक्दिनँ ।’ प्रधानमन्त्रीको भनाइ यस्तो रहेको संघका सदस्य बताउछन ।
माइतीघरलाई निषेधित क्षेत्र बनाउनुपर्छ र त्यो हुन्छ पनि भन्नुहुदै प्रधानमन्त्री ओलीले सर्वोच्च अदालतले भने पनि माइतीघर निषेधित हुने जानकारी दिनुभयो ।
देशलाई गुणस्तरीय चिकित्सा शिक्षाको हब बनाउँने बताउदै उहाँले गुणस्तरका लागि यसो गर्नुस् भने सुन्छु तर सम्बन्धन नदे भनेर एउटा व्यक्तिको दबाबमा सरकार ब्याक नहुने स्पष्ट पार्नुभयो ।