हेल्थ टुडे,
काठमाडौं, २८ असार : गृहमन्त्री रामबहादुर थापा ‘बादल’को आदेशमा ट्रमा सेन्टरमा कार्यरत वरिष्ठ चिकित्सक डा. भोजराज अधिकारीलाई अपहरण शैलीमा गृह मन्त्रालय लगेर धम्क्याएपछि अस्पतालले त्यसको विरोध गर्दै अर्को व्यवस्था नभएसम्मका लागि मेडिकल रिपोर्ट नबनाउने निर्णय गरेको छ ।
मंगलबार दिउँसो अस्पतालमा बिरामी जाँचिरहेका डा भोजराज अधिकारी अधिकारीलाई गृह मन्त्रालयकै गाडीमा लगेर गलत मेडिकल रिपोर्ट बनाउन दबाव दिएपछि अर्को व्यवस्था नभएसम्मका लागि मेडिकल रिपोर्ट नबनाउने र अपाङ्गता सिफारिस नगर्ने अस्पतालले निर्णय गरेको हो । डा अधिकारीलाई गृहमन्त्री थापाको आदेशमा आएका टोलीले द्वन्द्वकालका घाइतेहरुको अपांगताको रिपोर्ट उनीहरुको चाहना अनुरुप नै हुनुपर्ने, अन्यथा कारबाही गर्ने भन्दै धम्क्याएर मन्त्रालय लगेर एक कोठामा राखेर घन्टौंसम्म दुर्व्यवहार गरेका थिए ।
डा. अधिकारीलाई गृहमन्त्री थापाका सल्लाहकार सूर्य सुवेदीले एक घण्टासम्म धम्क्याएका थिए । आ
फूले गलत रिपोर्ट नदिने अडान डा. अधिकारीले राखेपछि उनलाई सत्ताको दुरुपयोग गर्दै मन्त्रालय लगेर धम्क्याएको हो । डा. अधिकारीले कुनै पनि हातलमा पनि गलत रिपोर्ट नदिने बताएपछि उनलाई छाडिएको थियो । विरामीको सेवामा तल्लिन भइरहने चिकित्सकलाई सुरक्षा दिनु पर्ने गृह मन्त्रालयले नै अपराधीलाई जस्तै केरकार गर्नु बिडम्बना भएको डा. अधिकारीले बताए । ‘ मलाई निकै तनाव दिए । प्रहरीले कैदीलाई केरकार गरेझैँ गर्यो । ’ डा अधिकारीले भने, ‘ गृहमन्त्रीको सल्लाहकारले नै मलाई हाम्रो महान् योद्धाहरुले भने अनुसारकै रिपोर्ट बनाउनुहोस् भन्दै हप्काए ।’
डा अधिकारीलाई मन्त्रालयमा बोलाइएको सल्लाहकार सुवेदीले स्विकार गरेपनि धम्क्याएको नभई कुराकानी गरेको बताए । साथीहरुको गुनासो आएपछि के भएको रहेछ भन्ने कुरा बुझ्नका लागि आफूले मन्त्रालय बोलाएको सुवेदीले बताए । डा अधिकारीलाई अपहरण शैलीमा गृह मन्त्रालय लगेर गरिएको दुर्व्यवहारप्रति सरकारी चिकित्सक संघ (गोदान) ले आपत्ति प्रकट गरेको छ । गोदानका आजीवन सदस्य रहेका डा.अधिकारीलाई ’द्वन्द्वकालका घाइतेहरुको अपांगताको रिपोर्ट उनीहरुको चाहना अनुरुप नै हुनुपर्ने, अन्यथा कारबाही गर्ने’ धम्की दिँदै मन्त्रालयमा घन्टौंसम्म दुर्व्यवहार गरिएको संघले विज्ञप्तिमा जनाएको छ ।
संघले चिकित्सा पेसामाथि धावा बोल्दै सरकारी पक्षबाटै असुरक्षित महसुस भएको उल्लेख गर्दै घटनाका दोषीमाथि कडा कारबाहीको माग समेत गरेको छ । दोषीमाथि कडा कारवाहीको माग समेत गोदानले गरेको छ ।
Leave a Reply