सडकमै उपचार–निशुल्क ओपिडी

हेल्थ टुडे,
काठमाडौं, २९ असारः आमरण अनसनरत डा. गोविन्द केसीको समर्थनमा आवासीय चिकित्सकहरुले माइतीघर मण्डलामा प्रदर्शन गरेका छन् । साथै उनीहरुले सांकेतिक विरोध जनाउने क्रममा खुला चौरमा नै विरामी जाँचेका छन् ।
डा. केसी १४ दिनदेखि जुम्लामा अनसनरत छन् । उनको स्वास्थ्य कमजोर बन्दै गएपछि शिक्षण अस्पतालका आवासीय चिकित्सकहरुले माइतीघर मण्डलामा प्रदर्शन गरेका हुन् ।
एप्रोनमै बीपी सेट बोकेर प्रदर्शनमा उत्रिएका उनीहरुले विरामीको जाँच पनि गरेका छन् । सडकमा हिँडिरहेकाहरुले ब्लड प्रेसर चेक गर्नुका साथै सामान्य विरामी हेरेका हुन । माइतीघर मण्डला छेउमै ओपिडी सेवा भनेर पोस्टर टाँसेर मध्याह्न १२ बजेबाट प्रदर्शनकारी डाक्टरहरुले ओपिडी सेवा सुरु गरेका हुन ।
नाक,कान घाँटी सम्बन्धी, आँखा सम्बन्धी, साथै न्युरो सम्बन्धी उपचार भैरहेकोे छ । शनिबार पनि माइतीघरमा निस्शुल्क ओपिडी सेवा चल्ने जनाइएको छ ।