चिकित्सा शिक्षा विधेयक फिर्ताको म्यान्डेट पछिमात्र वार्ता हुन्छ–डा केसी

हेल्थ टुडे,
काठमाडौं, २ साउनः सरकारले वार्ताको नामममा झारा टार्ने काम मात्र गरेको जनाउँदै अनसनरत डा गोविन्द केसीले म्यान्डेटबिना वार्ता नहुने बताएनुभएको छ । आज एक विज्ञप्ति जारी गर्दै डा केसीले सरकारले प्रारम्भिक चरणको वार्ता गरेकोमा हालसम्म सरकारका तर्फबाट माग पूरा गर्न कुनै पहल नभएको जनाउनुभएको हो । आवश्यक म्यान्डेट नै नदिई कर्मचारीहरु मात्र सम्मिलित वार्ता टोली पठाएर झारा टार्ने काम मात्रै भएको बताउनुभएको छ ।
’यसबाट सरकार अझै वार्ताका लागि जिम्मेवार र संवेदनशील नभएको तथा हामीले उठाएका एजेन्डाप्रति उदासीन रहेको देखिन्छ,’ विज्ञप्तिमा उल्लेख छ । यस्तो अवस्थामा आफ्ना मागहरु सम्बोधन गर्न सरकारले आवश्यक वातावरण नबनाएसम्म अर्को चरणको वार्ता गर्नुको औचित्य नहुने केसी बताउनु हुन्छ ।
’वार्तालाई तार्किक निष्कर्षमा पुर्याउन तत्काल चिकित्सा शिक्षा विधेयक फिर्ता गरेर पूर्ण म्यान्डेट सहितको वार्ता टोली पठाउन सरकारलाई आग्रह गर्दर्छौं । त्यसो भएपछि मात्रै अर्को चरणको वार्तामा बस्ने जानकारी पनि गराउँछौं,’ केसीद्धारा जारी विज्ञप्तिमा उल्लेख छ ।

दुई दिनयता सरकारी वार्ता टोली र डा गोविन्द केसी पक्षबीच पटकपटक भएको वार्ता विफल भएको भैसकेको छ । सरकारी टोली गम्भीर नदेखिँदा वार्ता फलदायी हुन नसकेको केसी पक्षका वार्ता टोलीका सदस्यको भनाइ छ। मंगलबार मात्रै दुई पटक वार्ता भएको थियो ।
डा केसीको मागमा वार्ता गर्न सोमबारको मन्त्रिपरिषद् बैठकले शिक्षा मन्त्रालयका सचिव खगराज बरालको नेतृत्वमा तीन सदस्यीय टोली गठन गरेको थियो। वार्तामा सरकारका तर्फबाट शिक्षा सचिव बराल, गृह मन्त्रालयका सहसचिव केदार न्यौपाने र स्वास्थ्य सेवा विभागका महानिर्देशक डा गुणराज लोहनी सहभागी थिए। डा केसीका तर्फबाट डा सिंह, वरिष्ठ अधिवक्ता सुरेन्द्र भण्डारी, ओमप्रकाश अर्याल र नेपाल चिकित्सक संघका प्रतिनिधि सहभागी छन् ।
डा केसी गत असार १६ देखि जुम्लामा अनसनमा हुनुहुन्छ र उहाँको स्वास्थ्य अवस्था दिनदिनै जटिल बन्दै गइरहेको चिकित्सकहरु बताउछन ।