नेपालगन्जमा सैनिक अस्पताल स्थापना

हेल्थ टुडे,
नेपालगन्ज, ११ साउनः प्रधानसेनापती राजेन्द्र क्षेत्रीले बाँकेको नेपालगन्ज स्थित नं ४ बाहिनी नेपालगन्जमा नवनिर्मित सैनिक अस्पताल उद्घाटन गर्नुभएको छ । अस्पताल उद्घाटनपछि प्रधानसेनापति क्षेत्रीले अस्पतालका विभिन्न वार्डको अवलोकन गर्नुका साथै अस्पतालबाट प्रदान गरिने सेवाका बारेमा जानकारी लिनुभएको छ ।
क्षेत्रीले अस्पतालमा भर्ना भएका बिरामीहरुलाई फलफुल वितरण गर्नुका साथै उनीहरुको उपचारको अवस्थाका बारेमा जानकारी लिनसभएको थियो । सैनिक कल्याणकारी कोषको करिव १७ करोड २० लाख रुपैयाँको लागतमा करिव १४ रोपनी क्षेत्रमा निर्माण गरिएको अस्पतालमा ५० शय्या छन् । सैनिक अस्पताल नेपालगन्ज काठमाडौंको छाउनी अस्पताल पछिको दोस्रो ठूलो र सुविधा सम्पन्न अस्पताल हो ।
अस्पतालमा जनरल ओपिडि, प्रसुती, बाल रोग, सर्जिकल, आइसोलेशन, मेडिकल सघन उपचार केन्द्र, डेन्टल र पोष्ट अपरेटिभ वार्ड रहेका छन् । अस्पतालमा आइसियु, आकस्मिक कक्ष, प्याथोलोजी, इन्डोस्कोपी, अल्ट्रासाउन्ड, एक्सरे र अप्रेशन कक्षको समेत सुविधा उपलब्ध छ ।
अस्पातलमा हाल १० जना चिकित्सक, स्वास्थ्यकर्मी सहित ८० जना कार्यरत छन् भने निकट भवष्यमै अस्पतालमा थप चिकित्सक र स्वास्थ्यकर्मी थपिदै जाने अस्पतालका प्रमुख डा नरेन्द्रप्रसाद बाँस्कोटाले बताउनुभएको छ ।
नेपाली सेनाका कार्यरत सैनिक तथा भूतपूर्व सैनिक तथा उनका आफन्तहरुलाई सहज रुपमा स्वास्थ्य सेवा पुर्याउने उद्देश्यले अस्पताल निर्माण गरिएको हो ।