कर्मचारीलाई लक्षित गरी स्तनपान कक्षको स्थापना

काठमाडौं, १६ साउनः स्तनपान जीवनको आधार भन्ने मूल नाराका साथ यो वर्षको विश्व स्तनपान सप्ताह आजबाट शुरू भएको छ । स्तनपान सप्तको अवसरमा विभागमा कार्यरत कर्मचारी तथा सेवाग्राहीलाई लक्ष्य गर्दै स्तनपान कक्षको स्थापना गरिएको स्वास्थ्य सेवा विभागले जनाएको छ ।
बुधबार विभाग परिसरमा स्वास्थ्य मन्त्रालयका निमित्त सचिव डा. सुशील प्याकुरेल, विभागका महानिर्देशक डा. गुणराज लोहनी र युनिसेफ नेपालका प्रतिनिधि टोमो होजुमीले संयुक्त रूपमा कक्षको उद्घाटन गरेका थिए । विभागमा स्थापना गरेको स्तनपान कक्षमा बच्चा सुताउने ठाउँ र हात धुने ठाउँ राखिएको छ । उक्त कक्षमा दुईजना महिलाले एकैपटक स्तनपान गराउन सक्ने विभागले जनाएको छ ।
स्वास्थ्य मन्त्रालयका निमित्त सचिव डा. सुशील प्याकुरेलले विभागमा रहेको स्तनपान कक्षले शुक्रराज ट्रपिकल तथा सरुवा रोग अस्पतालमा सेवा लिन आउने महिलालाई समेत सहज हुने बताउनुभएको छ ।
नेपालको जनसांख्यिक स्वास्थ्य सर्वेक्षण २०१६ को तथ्याङ्क अनुसार नेपालमा पूर्णस्तनपान गराउने आमाको संख्या ६६ प्रतिशत र शिशु जन्मेको १ घण्टाभित्रमा स्तनपान गराउने महिलाको संख्या ५५ प्रतिशत रहेको छ ।
यस्तै स्तनपान गराउनु अघि १० जना नवजात शिशुमध्ये ३ जना शिशुलाई घ्यू, मह र चिनी चटाउने गरिएको छ । शल्यक्रिया गरी जन्मिएका शिशुलाई भने आमाको दूधलाई प्रतिस्थापन गर्ने फर्मूला खुवाइने गरेको छ ।
स्तनपानका साथ साथै अरू थप आहार खुवाइएको सङ्ख्या १२प्रतिशत छ । स्तनपानका साथै अरू झोलिलो खाना खुवाउनेको सङ्ख्या २२ प्रतिशत छ । शिशुलाई कहिल्यै पनि स्थानपान नगराएको भने १ प्रतिशत मात्रै छ ।
स्वास्थ्य सेवा विभागले नवजात शिशुलाई स्तनपानको अधिकार सुनिश्चित गर्न आर्थिक वर्ष्भित्रमा ३० वटा सार्वजनिक स्थल तथा स्वास्थ्य संस्थाहरूमा स्तनपान कक्ष सञ्चालन गर्ने योजना बनाएको छ । देशका ३० वटा अस्पताललाई मातृ तथा बालमैत्रि अस्पतालको रूपमा विकास गर्न योजना छ ।