अनुसन्धानका आधारमा नीति र योजना बनाउनु पर्छ : यादव

हेल्थ टुडे,

काठमाडौं, ५ भदौ : उपप्रधान एवं स्वास्थ्य तथा जनसंख्या मन्त्री उपेन्द्र यादवले स्वास्थ्य मन्त्रालयले अनुसन्धानका आधारमा नीति र योजना बनाउनु आवश्यक रहेको बताएका छन् । नेपाल स्वास्थ्य अनुसन्धान परिषद्ले जिआईजेटको सहयोगमा मंगलबार राजधानीमा आयोजना गरेको गोष्टीमा मन्त्री यादवले अनुसन्धानका आधारमा बनाइने नीति र योजना दीर्घकालिन हुने बताउदै त्यस्ता योजना प्रभावकारी पनि हुने दाबी गरे । केन्द्रिय सरकारले मात्र नभएर प्रदेश सरकार र स्थानिय सरकारले पनि स्वास्थ्य सम्बन्धी नीति योजना बनाउदा अनुसन्धानलाई आधार बनाउनु पर्नेमा यादवले जोड दिए । उनले भने, ‘राष्ट्रिय रुपमा उपलब्ध अनुसन्धानहरुलाई केन्द्रको दृष्टिकोण बनाउन प्रयोग गरेजस्तै हरेक प्रदेश र स्थानिय सरकारले समेत आआफ्ना परिवेश र आवश्यकताका आधारमा वैज्ञानिक अनुसन्धान गर्ने र ती तथ्यमा टेकेर नै योजना तथा कार्यक्रम बनाउनु पर्छ । ’         नेपाल स्वास्थ्य अनुसनधान परिषद्का कार्यकारी अध्यक्ष डा. अञ्जनीकुमार झाले अनुसन्धानमा आधारित रहेर नीति निर्माण गर्दा लक्ष्यहरु हासिल गर्न सहज हुने र सिमित श्रोत साधनबाट स्वास्थ्य सम्बन्धी लक्ष्यहरु हासिल गर्न सजिलो हुने भएकाले यो तथ्यलाई सरकारले बिर्सन  नहुनेमा जोड दिए । तथ्य र प्रमाणका आधारमा रहेर मात्र कुनै पनि कुराको विश्वास गर्न सकिने स्मरण गर्दै डा. झाले त्यसका लागि अनुसन्धानलाई प्राथमिकता दिने संस्कारको विकाश हुनु पर्ने आवश्यक रहेको बताए ।  परिषद्को अनुसन्धान गर्ने र गराउने वातावरण बनाएको दाबी गर्दै देशका लागि अत्यावश्यक सिकलसेल एनिमिया, क्यान्सर, वातावरण प्रदुशण लगायतका ५ क्षेत्रमा  परिषद्ले अनुसन्धान गरेको जानकारी उनले दिए । गोष्टीमा जिआईजेडका प्राविधिक सल्लाहकार डा. पाउलले अनुसन्धानबाट प्राप्त लक्ष्यहरुलाई नीति निर्माण तहमा पु्याउन र अनुसन्धानमा आधारित नतिजा बनाउने दरका बिषयमा कार्यपत्र प्रस्तुत गरेका थिए । गोष्टीमा स्वास्थ्य तथा जनसंख्या मन्त्रालय मातहतका नीति निर्माताका साथै अनुसन्धानकर्ताहरुको सहभागीता रहेको थियो ।