सरकारी चिकित्सकको आन्दोलन जारी, आकस्मिक बाहेकका सम्पूर्ण सेवा बहिस्कार

काठमाडौ,१० फागुन । सरकारले ल्याएको कर्मचारी समायोजन विधेयकविरुद्ध आन्दोलनरत सरकारी चिकित्सकहरुले आज सरकारी अस्पतालका आकस्मिक बाहेकका सम्पूर्ण सेवा बहिस्कार गरेका छन् । सरकारी चिकित्सक संघ (गोदान) ले आज देशै भरीका सरकारी अस्पतालमा आकस्मिक बाहेकका सम्पूर्ण सेवा बहिस्कार गरेका हुन् ।

सरकारले ल्याएको कर्मचारी समायोजन विधेयकविरुद्ध उनीहरुले आन्दोलन गर्दै आएका छन्। एक महिनाअघि सरकारले माग पूरा गर्ने सहमति गरे पनि कार्यान्वयन नगरेको भन्दै उनीहरु फेरि आन्दोलित भएका छन् ।

त्यस्तै सरकारले तत्काल माग पूरा नगरे सामूहिक राजीनामा दिने उनीहरुले चेतावनी दिँदै आएका छन् । सामुहिक राजीनामा दिनको लागि उनीहरुले हस्ताक्षर संकलन गरिरहेका छन् ।

गोदानले बिहिबार एक विज्ञप्ती जारी गरेर उपत्यकाभरीका सम्पूर्ण चिकित्सकहरुलाई विहान १० बजे वीर अस्पतालको प्राङगणमा भेला हुन र माइतिघरसम्म आयोजना गरिएको ¥यालीमा सहभागि हुन आह्वान गरेको छ । उपत्यका बाहिरका अस्पतालहरुमा भने अस्पतालकै प्राङ्गणमा भेला भएर धर्ना दिन आह्वान गरेको छ ।