हेल्थ टुडे,
भक्तपुर, ३० फागुन : उपप्रधानमन्त्री एवं स्वास्थ्य तथा जनसंख्या मन्त्री उपेन्द्र यादव र राज्यमन्त्री डा. सुरेन्द्र यादवले मरणोपरान्त अंगदान घोषणा गरेका छन् । विश्व मिर्गौला दिवसको अवसरमा भक्तपुरस्थित शहिद धर्मभक्त राष्ट्रिय प्रत्यारोपण केन्द्रले बिहीबार आयोजनामा प्रत्यारोपण खेलकुद तथा मिर्गौला सचेतना कार्यक्रममा मन्त्री र राज्यमन्त्रीले मरणोपरान्त अंगदान गरेको घोषणा गरेका हुन् । मन्त्री र राज्यमन्त्रीलाई आरोग्य फाउण्डेसनका कार्यकारी सदस्य एवं वरिष्ठ कलाकार मदनकृष्ण श्रेष्ठले दान गरेको प्रमाणपत्र प्रदान गरेका हुन ।
कार्यक्रममा बोल्दै उपप्रधानमन्त्री एवं स्वास्थ्य मन्त्री यादवले पछिल्ला वर्षहरुमा मिर्गौला, मुटु, क्यान्सर लगायतका न
सर्ने रोगको संक्रमण बढ्दै गएकोमा चिन्ता व्यक्त गर्दै यी रोगहरु लागेपछि उपचारमा ठूलो धनरासी खर्च गर्नुको सट्टा जनचेतना मार्फत रोग लाग्नै नदिने उपायमा लाग्न जोड दिए । सरकारले अस्पताल बनाएर र डाक्टर थपेर मात्र नसर्ने रोगको संक्रमण कम गर्न नसकिने जिकीर गर्दै मन्त्री यादवले सचेतना जगाउने काममा सबैको सहकार्य हुनु पर्ने बताए । राज्यमन्त्री डा. यादवले सरकारले मिर्गौलाका विरामीका लागि डायलासिस र प्रत्यारोपण दुबै सेवा निःशुल्क भए पनि डायलासिस भन्दा प्रत्यारोपणमा जोड दिनु पर्ने बताए । केन्द्रका कार्यकारी निर्देशक डा.पुकारचन्द्र श्रेष्ठले एक व्यक्तिले गरेको अंगदानबाट आठवटा अंग प्रत्यारोपण गर्न सकिने भएकाले अंगदानबाट हजारौ व्यक्तिले नयाँ जिवन पाउने अवस्था रहेको बताए । डा.श्रेष्ठले पछिल्लो एक दशकमा नेपालमा मिर्गौला उपचारको क्षेत्रमा उल्लेखनिय प्रगति भएको जानकारी दिए ।
नेपाल औषधि उत्पादक संघका अध्यक्ष दीपकप्रसाद दाहालले मरणोपरान्त अंगदान सम्बन्धी जनचेतना जगाउने अभियानमा संघले हातेमालो गरेर अगाडि बढीरहेको र भविश्यमा पनि अभियान जारी रहने बताए । कार्यक्रममा आरोग्य फाउण्डेसनका कार्यकारी सदस्यहरु वरिष्ठ कलाकारहरु मदनकृष्ण श्रेष्ठ र हरिवंश आचार्य, अष्टेलियाका राजदूत, दक्षिण कोरियाका राजदूत लगायतले मिर्गौला बिग्रन नदिन सचेतना आवश्यक रहेकोमा जोड दिएका थिए ।
स्वास्थ्य मन्त्री र मिर्गौला प्रत्यारोपीबिचको फुटबल बराबरीमा
सो अवसरमा आयोजनामा गरिएको प्रत्यारोपण खेलकुद अन्तरगत भएको फुटवल प्रतियोगितामा उपप्रधानमन्त्री एवं स्वास्थ्य मन्त्री उपेन्द्र यादवले नेतृत्व गरेको टीम र मिर्गौला प्रत्यारोपीहरुबिच भएको मैत्रीपूर्ण फुटबलमा दुबै तर्फबाट एक एक गोल भएर खेल बराबरीमा सकिएको थियो । मन्त्री यादवले नेतृत्व गरेको टीममा राज्यमन्त्री डा. यादव, महजोडी, केन्द्रका कार्यकारी निर्देशक डा. श्रेष्ठ, डा. राकेश बर्मा र राजदूतहरु थिए भने अर्को टीममा मिर्गौला प्रत्यारोपण गराएकाहरु थिए । नेपालमा हरेक वर्ष कम्तिमा ३ हजारको मिर्गौला फेल हुने भएको अनुमान छ । कार्यक्रममा पप गायक दीपक बज्रचार्यले सांगितिक प्रस्तुति पस्केका थिए ।
Leave a Reply