निजि मेडिकल कलेजको बेथिति जारी रहेको भन्दै डा.केसीद्वारा आन्दोलनको चेतावनी

हेल्थ टुडे,
काठमाडौ,८ चैतः निजि मेडिकल कलेजहरुले दिनदाहाडै ठगी गरेर राज्यको उपहास गरिरहेको आरोप लगाउँदै त्रिवि शिक्षण अस्पताल महाराजगञ्जका बरिष्ठ हाडजोर्नी विशेषज्ञ डा. गोविन्द केसीले आन्दोलन गर्ने चेतावनी दिएका छन् । डा. केसीले ठग मेडिकल कलेजका संचालकहरुलाई कानुनको दायरामा ल्याउन सरकारसंग माग समेत गरेका छन् ।

डा. केसीले बिहीबार बिज्ञप्ती जारी गरि ठग मेडिकल कलेजलाई कारवाही गर्न चिकित्साशास्त्र अध्ययन संस्थानलाई आग्रह गरेका छन् । बिज्ञप्तिमा भनिएको छ ‘मेडिकल शिक्षा र स्वास्थ्य क्षेत्रमा सुधार, सुशासन, सबै विपन्न नागरिकहरुको सस्तो, सुलभ र गुणस्तरीय स्वास्थ्य सेवा पाउने अधिकार तथा सबै विद्यार्थीको योग्यताका आधारमा निःशुल्क वा सस्तो शुल्कमा चिकित्सा तथा स्वास्थ्य शिक्षाका अन्य विषयहरु पढ्ने अधिकार सुनिश्चित गर्न माग गर्दछु ।’

उनले लामो संघर्षपछि बनेको माथेमा कार्यदलले दिएको सुझाव अनुसार मेडिकल शिक्षामा शुल्क निर्धारण गर्न पनि सरकारसंग माग गरेका छन् ।  नेपालका निजी मेडिकल कलेजहरुले विद्यार्थीहरुसँग वार्षिक अरबौं रुपैयाँ ठगी गर्दापनि सरकार अझै मुकदर्शक भएको भन्दै डा. केसीले राज्यद्धारा संरक्षित मेडिकल माफियाहरुलाई कारवाहीको दायरमा ल्याउन समेत आग्रह गरेका छन् ।