स्वास्थ्य तथा जनसंख्या वैज्ञानिकहरुको पाँचौ सम्मेलन बुधबारदेखि

हेल्थ टुडे,
काठमाडौ,२६ चैतः नेपाल स्वास्थ्य अनुसन्धान परिषद्ले भोली (चैत २७) देखि स्वास्थ्य तथा जनसंख्या वैज्ञानिकहरुको पाँचौ शिखर सम्मेलन आयोजना गर्दैछ । ‘संघीय प्रणालीमा समता र विकासका लागि अनुसन्धान’ नाराका साथ सम्मलेन चैत २९ गतेसम्म चल्नेछ ।

सम्मेलनमा स्वास्थ्य समता र विकास, सामाजिक स्वास्थ्य बीमा, नसर्ने रोग, मातृ स्वास्थ्य, बाल स्वास्थ्य र किशोर किशोरी स्वास्थ्य, मानसिक स्वास्थ्य, सरुवा रोग, जैविक स्वास्थ्य र स्वास्थ्य सूचना, स्वास्थ्य प्रणाली, हेल्थ इकोनोमिक्स तथा फाईनान्सिङ र स्वास्थ्य सम्बद्र्धन , प्रविधी र आवश्यक मेडिकल उत्पादन जस्ता विषयमा अनुसन्धानात्मक प्रस्तुती हुने परिषद्ले जनाएको छ ।

परिषद्ले सम्मेलनका लागि स्वास्थ्यका विविध विषयमा २ सय ७७ अनुसन्धानहरुमध्ये वैज्ञानिक कमिटिको मापदण्ड अनुसार १ सय ३७ अनुसन्धान छनौट गरिएको जनाएको छ । छनौट भएका मध्ये ३३ वटाको मौखिक प्रस्तुतीकरण र १ सय ४ वटाको पोस्टर प्रस्तुतीकरण हुनेछ ।

सम्मेलनमा प्रस्तुत गरिएका मध्येबाट ७ वटा विधामा उत्कृष्ट वैज्ञानिकलाई सम्मान गरिनेछ । सम्मेलनमा एक हजार व्यक्ति सहभागी हुने परिषद्ले जनाएको छ ।