कर्मचारी समायोजन प्रक्रियाको विरोधमा स्वास्थ्य सहायकहरु पनि आन्दोलित

हेल्थ टुडे,
काठमाडौ,५ बैशाखः स्वास्थ्य समुहका कर्मचारी समायोजन प्रक्रियाको विरोध गर्दै स्वास्थ्य सहायक (हेल्थ असिस्टेन्ट) पनि आन्दोलनमा उत्रिएका छन् । कर्मचारी समायोजनको विरोधमा स्वास्थ्य सेवा नै ठप्प हुने गरी आन्दोलनमा उत्रिएका सरकारी चिकित्सकहरुको समस्या समाधान नहुदै स्वास्थ्य सहायकहरु पनि आन्दोलनमा उत्रिएपछि स्वास्थ्य समूहमा समायोजन प्रक्रिया झन् जटिल बन्दै गएको छ ।

सरकारी चिकित्सकहरुले अस्पताल नै ठप्प हुने गरी नौ दिन लामो आन्दोलन गरेका थिए । सरकारले माग सम्बोधनको लागि आन्दोलनरत चिकित्सकसंग १५ दिनको समय मागेपछि बैशाख १५ गतेसम्मको लागि सरकारी चिकित्सकहरुले आन्दोलन स्थगित गरेका छन् । आफुहरुले उठाएका माग सम्बोधन नभए पुनः कडा आन्दोलन गर्ने चिकित्सकहरुले चेतावनी दिईसकेका छन् ।

सरकारी चिकित्सकहरुको माग सम्बोधन बारे छलफल भईरहँदा स्वास्थ्य सहायक (हेल्थ असिस्टेन्ट) हरुले पनि समायोजन प्रक्रियामा रहेको व्यापक त्रुटि सच्याउनुपर्ने माग राखी स्वास्थ्य तथा जनसंख्या मन्त्री उपेन्द्र यादवलाई ज्ञापनपत्र पेश गरेका छन् । आफुहरुका माग सुनुवाइ नगरे कडा आन्दोलनमै जाने उनीहरुले चेतावनी दिएका छन् । स्वास्थ्य ऐनमा नै कर्मचारी समायोजन गर्दा एक तह बढाएर समायोजन गर्ने व्यवस्था गरिए पनि एक तह घटाएर स्वास्थ्य सहायकलाई राखिएकोले आन्दोलन गर्नुपरेको स्वास्थ्य सहायकहरुको तर्क छ ।

हेल्थ असिष्टेन्ट संघका बरिष्ठ उपाध्यक्ष दीपेन्द्र खड्काले समायोजनमा एक तह घटुवा गरेकोले आन्दोलित हुनुपरेको बताए । उनले भनेः‘हामीले समायोजन सच्याउन ध्यानाकर्षण मात्र गरेका छौँ, सरकारले हेल्थ असिष्टेन्टको माग सुनुवाइ नगरे कडा आन्दोलनमा जान बाध्य हुनेछौ ।’

यता, संघीय मामिला तथा सामान्य प्रशासन मन्त्रालयले स्वास्थ्यका कर्मचारीलाई समायोजनमा चित्त नबुझे गुनासो दर्ता गर्न सकिने व्यवस्था गरेको जनाएको छ । उनीहरुले बिहीबारसम्म गुनासो गर्न सक्नेछन् ।