हेल्थ टुडे,
काठमाडौ,१८ बैशाखः नेपालमा क्षयरोगबाट वर्षेनी सात हजार मानिसको मृत्यु हुने गरेको तथ्याङ्क सार्वजनिक भएको छ । नेपाल क्षयरोग निवारण संस्था विराटनगर शाखाका कार्यक्रम संयोजक घनश्याम कोइरालाले जनचेतनाको अभावका कारण वर्षेनी सात हजारको संख्यामा मानिसको मृत्यु हुने गरेको जानकारी दिएका छन् ।
क्षयरोगबाट मृत्यु हुनेको सङ्ख्या प्रत्येक वर्ष वृद्धि हुँदै गइरहेको र हालको तथ्याङ्क अनुसार ८० हजार क्षयरोगीले उपचार गराइरहेका उनले जानकारी दिए । उनले यस्ता रोगीको सङ्ख्या प्रत्येक वर्ष ४० हजारका दरले थप भइरहेको दावी गरे ।
समयमा उपचार नगराउने, खानपानमा हेलचेक्र्याइँ, जनचेतनाको कमी, पूरा समय औषधि सेवन नगर्नाले मृत्यु दर र रोगीको सङ्ख्यामा वृद्धि भइरहेको हो । एक क्षयरोगीले उपचार नगराउँदा १५ जनासम्मलाई सर्न सक्ने सम्भाबना हुन्छ ।
औषधि सेवन गरेमा यो रोग ९१ प्रतिशत निको हुने संयोजक कोइरालाले बताए । सरकारले क्षयरोगका बिरामीलाई निःशुल्क औषधि वितरण गर्दै आएको छ भने क्षयरोगको औषधि अभाव नरहेको सरकारको भनाई छ ।
विराटनगर महानगरपालिकामा मात्रै गत आर्थिक वर्षमा २५१ क्षयरोगका बिरामी भेटिएका थिए । बजेटको अभाव र सबै जिल्ला तथा स्वास्थ्य संस्थामा क्षयरोग निवारणसम्बन्धी कार्यक्रम नभएकाले यो रोग नियन्त्रणमा कठिन भएको संयोजक कोइरालाको भनाई छ ।
Leave a Reply