सुरक्षित सुत्केरीको लागि नगरपालिकाद्वारा जनचेतना अभियान सञ्चालन

हेल्थ टुडे,
जुम्ला,१९ बैशाखः जुम्लाको चन्दननाथ नगरपालिकाले गर्भवती महिलाहरुलाई सुरक्षित रुपमा सुत्केरी गराउन जनचेतना अभियान सुरु गरेको छ । नगरपालिकाले अस्पतालमै सुत्केरी गराउनुपर्ने, चार पटक गर्भजाँच गर्ने र स्वास्थ्यकर्मीको आवश्यक सल्लाह सुझावका लागि जनचेतना अभियान सुरु गरेको हो ।

चन्दननाथ नगरपालिकाको आयोजना र ब्रेक थ्रो एक्सनको सहयोगमा सुरक्षित मातृत्वको लागि अभियान सञ्चालन गरिएको हो । अभियानमा गर्भवतीको भेला, गर्भवती परीक्षण, सरसफाई, जन्मान्तर, परिवार नियोजनसम्बन्धी जानकारी गराइने छ ।

नियमित रुपमा गर्भवती जाँच तथा संस्थागत सुत्केरी बढाउँदै कार्यक्रम प्रभावकारी बनाउन आमा समूह बैठक, घरदैलो भेटघाट, गर्भवती भेला लगायतका कार्यक्रम गरिने नगरपालिकाले जनाएको छ ।

घरमा सुत्केरी हुँदा आमा तथा नवजात शिशुको स्वास्थ्य जोखिम नहोस भनेर गर्भवतीलाई संस्थागत सुत्केरी हुन प्रेरित गर्न स्वास्थ्य व्यवस्थापन समिति, महिला स्वास्थ्य स्वयंसेविका र स्वास्थ्यकर्मीको सक्रियतालाई बढाइएको हो ।

यसैबीच, चन्दननाथ नगरपालिकाका वडाभरी रहेका ५० जना गर्भवती महिलालाई सरसफाई किट्स वितरण गरिएको छ । बुहक्षेत्रीय पोषण कार्यक्रमको सहयोग र नगरपालिकाको समन्वयमा साबुन, नेलकटर, ब्रस, टुथपेस्ट लगायतका सामाग्री वितरण गरेको हो ।