प्रधानमन्त्री ओली स्वास्थ्य उपचारका लागि सिंगापुर जाने

हेल्थ टुडे,
काठमाडौ,१४ साउनः प्रधानमन्त्री केपी शर्मा ओली स्वास्थ्य उपचारको लागि आउँदो शनिबार सिंगापुर जाने भएका छन् । प्रधानमन्त्री ओली उपचारका लागि सिंगापुर जान लागेका निजी सचिवालयले जनाएको छ । प्रधानमन्त्री ओली साता अघि तिलगंगा आँखा अस्पतालको कार्यक्रममा भाग लिएर फर्किएदेखि अस्वस्थ रहेको सचिवालयले जनाएको छ । शनिवार छाउनीस्थिति सैनिक अस्पतालमा गरिएको परीक्षणमा ओलीको शरीरमा चिनीको मात्रा तलमाथि भएको पाइएको थियो ।

प्रधानमन्त्रीका निजी चिकित्सक दिव्या सिंहले अहिले विशेषज्ञ डाक्टरको राय लिन प्रधानमन्त्री ओली सिंगापुर जान लागेको जानकारी दिईन् । उनका अनुसार पछिल्लो दुई वर्षयता विज्ञ डाक्टरहरुले प्रधानमन्त्री ओलीको ‘रिपोर्ट कार्ड’ हेरेका छैनन् । गत वर्ष दशैंको टीका लगाइदिने क्रममा संक्रमण भएपछि प्रधानमन्त्री ओली १२ कात्तिकमा मनमोहन कार्डियोथोरासिक भास्कुलर एण्ड ट्रान्सप्लान्ट सेन्टरमा भर्ना भएर पाँच दिन बसेका थिए ।

त्यसयता बेलाबेला फलोअपका लागि अस्पताल पुग्ने गरेका प्रधानमन्त्रीलाई निजी चिकित्सक दिव्या सिंहले नियमित चेकजाँच गर्दै आएकी छिन् । डाक्टर सिंहकाअनुसार प्रधानमन्त्री ओलीलाई कामको धपेडी धेरै छ । सिंगापुरमा प्रधानमन्त्री ओलीको होलबडी चेकअप हुने सिंहले जानकारी दिईन् । प्रधानमन्त्री ओलीको झण्डै १२ वर्ष पहिले भारतको अपोलो अस्पतालमा मिर्गौला प्रत्यारोपण गरिएको थियो । त्यसयता उनले निरन्तर औषधि खाइरहेका छन् । प्रत्यारोपण गरेका सबैले जीवनभर औषधि खानुपर्छ ।