जित्ने दाबी सहित डा.लोचन कार्की नेतृत्वको लोकतान्त्रिक समूहले जारी गर्यो चुनावी घोषणा पत्र

हेल्थ टुडे,
काठमाडौं, ४ पुष : नेपाल चिकित्सक संघको आगामी निर्वाचनका लागि डा.लोचन कार्की नेतृत्वको लोकतान्त्रिक तथा पेसागत समूहले ५ बुदे प्रतिवद्धता सहित चुनावी घोषणापत्र जारी गरेको छ । राजधानीमा शुक्रबार पत्रकार सम्मेलनको आयोजना गर्दै डा.कार्की नेतृत्वको समूहले आफ्नो चुनावी घोषणा पत्र सार्वजनिक गरेको हो । चिकित्सकहरुको पेशागत सुरक्षा र वृतिविकाश, गुणस्तरीय चिकित्सा शिक्षा र स्वास्थ्य सेवा, राष्ट्रिय नीति, योजना निर्माणमा योगदान र अन्तर्राष्ट्रिय सम्बन्ध, सरकारी नीजि साझेदारी र संघको संस्थागत विकास तथा सांगठनिक पुनः संरचना पुरा गर्ने बाचा सहित ५ बुदे प्रतिवद्धता सहित समूहले घोषणापत्र जारी गरेको हो ।
घोषणापत्र सार्वजनिकिकरण कार्यक्रममा डा. कार्कीले संघको महासचिव भएर चिकित्सकहरुको पेसागत सुधारका लागि गर्नु पर्ने धेरै काम गरेको र केही काम गर्न बाकी रहेकाले ती काम पुरा गर्न आफ्नो नेतृत्वलाई आम चिकित्सकहरुले स्विकार्ने विश्वास व्यक्त गरे । उनले भने, ‘नेपाल चिकित्सक संघको महासचिव भएर तीन वर्ष काम गर्दा मैले आमचिकित्सक र चिकित्सा पेसाका समस्या चिनिसकेको छु । तिनीहरुमध्ये धेरै समस्या हल पनि भइसकेका छन । बाकी रहेका समस्या समाधान गर्न सक्षम रहेकाले सबै चिकित्सकहरुको सहयोगको उपेक्षा गरेको छु । ’
बिसं २००७ सालमा स्थापना भएको नेपाल चिकित्सक संघको गरिमा र छविलाई जोगाइराख्न आफू नेतृत्वको समूह सक्षम रहेको डा. कार्कीले बताए । अध्यक्ष, वरिष्ठ उपाध्यक्ष, उपाध्यक्ष, महासचिव, कोषाध्यक्ष सहित १३ सदस्यिय संघको नयाँ नेतृत्वका लागि लोकतान्त्रिक तथा पेशागत समूहले मात्र १३ वटै पदमा उम्मेदवारी दिएको जानकारी गराउदै आफ्नो टिम समावेशी, सक्षम र अनुभवी भएको दावी डा. कार्कीले गरे । चिकित्सक र स्वास्थ्य संस्थाहरुमाथि हुने आकर्मण गर्नेलाई बिना धरौटी कारवाही गर्नु पर्ने बिषयलाई मन्त्रीपरिषद्सम्म पुर्याउन सफल भएको, चिकित्सकहरुको सेवा र सुविधाको कुरा टुंगोसम्म पुर्याएको, नेपाल चिकित्सक संघको अन्तर्राष्ट्रिय सम्बन्ध सुधार, भवन निर्माण, युवा चिकित्सकहरुको दक्षता अभिवृदि लगायतका बिषयमा संघको वर्तमान नेतृत्वले सफलता पाएको संघका अध्यक्ष डा. मुक्तिराम श्रेष्ठले बताए । कार्यक्रममा महासचिवका उम्मेवदार डा. बद्री रिजालले महासचिवमा ४ जना उम्मेदवार भएकाले आफ्नो जित सहज भएको बताए । कार्यक्रममा वरिष्ठ उपाध्यक्षका उम्मेदवार डा. शिवप्रसाद श्रेष्ठ, कोषाध्यक्षका उम्मेदवार डा. प्रकाश बुढाथोकी, सदस्यका उम्मेदवार डा. विश्वराज दवाडी, डा. बिक्रान्त दाहाल, डा. रितेश थापा लगायतको उपस्थिति थियो ।
चिकित्सक संघको नयाँ नेतृत्वका लागि आउदो माघ ४ र ५ गते उपत्यका बाहिर र माघ १७ देखि २१ गतेसम्म उपत्यकामा निर्वाचन हुदैछ ।
निर्वाचनमा चिकित्सकहरु लोकतान्त्रिक समूह र प्रगतिशिल गरि मुख्य गरि दुई प्यानल चुनावी मैदानमा ओर्लिएका छन् । यसका अलावा महासहिव लगायत केही पदमा स्वतन्त्र उम्मेवदारी पनि परेको छ । लोकतान्त्रिक तथा पेशागत समूहले डा. कार्कीको नेतृत्वमा प्यानल घोषणा गरेको छ भने प्रगतिशिल समूहले डा. पुष्पमणी खरालको नेतृत्वमा प्यानल घोषणा गरेको छ । तर प्रगतिशिलले आफ्नो पुरै प्यानल घोषणा गर्न सकेको छैन । संघको १३ सदस्यिय नेतृत्वका लागि ३० जना चुनावी मैदानमा उत्रिएका छन । नेपाल मेडिकल काउन्सिलमा करिव २५ हजार चिकित्सक दर्ता छन । ती मध्ये ११ हजार नेपाल चिकित्सक संघको सदस्य छन । संघको इतिहासमा अहिलेसम्म लोकतान्त्रिक समूहले जित हासिल गर्दै आइरहेको छ ।