लकडाउन वैशाख १५ गतेसम्म बढाउने सरकारको निर्णय

हेल्थ टुडे,
काठमाडौं, २ वैशाख : सरकारले कोरोना भाइरसको थप संक्रमण फैलिन नदिन घोषणा गरेको लकडाउन वैशाख १५ गतेसम्म बढाउने निर्णय गरेको छ ।
मंगलबार प्रधानमन्त्री निवास बालुवाटारमा बसेको मन्त्रिपरिषद् बैठकले सबै पक्षको सुझावका आधारमा लकडाउन वैशाख १५ गतेसम्म बढाउने निर्णय गरेको हो ।
नेपालमा दोस्रो संक्रमण देखिए लगतै सरकारले चैत ११ देखि १८ गतेसम्म लकडाउन गर्ने घोषणा गरेको थियो । त्यसयता दुई पटक ८ र ८ दिन लकडाउन थप भएको थियो । पछिल्लो लकडाउन पटक लम्ब्याइएको अवधि बैसाख ३ गतेसम्म कायम छ ।
त्यसको अघिल्लो दिन सरकारले थप १२ दिन लकडाउन गर्ने निर्णय गरेको हो । ‘कोरोना भइरसको संक्रमण फैलने सम्भावना कायम रहेकाले वैशाख १५ गते मध्यरातिसम्म लागू हुने गरी लकडाउन कायम गर्ने निर्णय भएको छ’, सरकारका प्रवक्ता एवं अर्थ र सञ्चारमन्त्री डा। युवराज खतिवडाले भनेका छन ।
बैठकले वैशाख १८ गतेसम्म हवाई उडान स्थगित गर्ने निर्णय गरेको छ । ‘नेपालमा बसोबास गर्ने सबैलाई सुरक्षा दिनका लागि नेपालमा अन्तर्राष्ट्रिय र खुला सिमानाबाट हुने आवतजावत बन्द गर्ने पहिलाको निर्णयलाई नै निरन्तरता दिइएको छ ‘ मन्त्री खतिवडाले भने ।