कोरोना जितेर टेकु अस्पतालबाट २७ दिनपछि डिस्चार्ज भइन् प्रसिद्धि

हेल्थ टुडे,
काठमाडौं, ६ बैसाख : कोरोना भाइरस पोजेटिभ देखिए पछि शुक्रराज ट्रपिकल तथा सरूवा रोग अस्पताल टेकुमा बिगत २७ दिनदेखि उपचार गराइरहेकी १९ बर्षिय प्रसिद्धि श्रेष्ठ पूर्ण निको भएर आज डिस्चार्ज भएकी छन् ।
फ्रान्सबाट आएकी प्रसिद्धि शुक्रराज ट्रपिकल तथा सरुवा रोग अस्पतालबाट कोरोना जितेर आज घर गएकी छन ।
उनी फ्रान्सबाट कतार हुँदै गत चैत ४ गते नेपाल आएकी थिइन । नेपाल फर्केपछि गरिएको नमुना परिक्षणमा उनमा कोरोना भाइरसको संक्रमण देखिएको थियो ।
त्यसपछि उनलाई चैत ९ गते अस्पताल भर्ना गरिएको थियो । टेकु अस्पतालका निर्देशक डा. सागरराज भण्डारीले प्रिलाष्ट परिक्षणमा दुई पटक कोभिड – १९ नेगिटिभ आएपछि उनलाई डिस्चार्ज गरिएको बताए ।
‘डिस्चार्ज गर्नु अघि दुई पटक परिक्षण गर्दा रिपोर्ट नेगेटिभ आउनुपर्छ । पहिला र दोश्रो दुबै परिक्षण नेगिटिभ आएको थियो । त्यसैले डिस्चार्ज गरिएको हो । ’ उनले भने । नेपालमा अहिलेसम्म कोरोना भाइरसबाट संक्रमितको संख्या ३० पुगेको छ ।
यी मध्ये एक जना पहिले नै निको भएर घर फर्किसकेका छन भने प्रसिद्धि कोरोना जित्ने दोश्रो व्यक्ति हुन । नेपालमा कोरोनाका कारण अहिलेसम्म कसैको पनि मृत्यु भएको छैन ।