बीपी कोइराला स्वास्थ्य विज्ञान प्रतिष्ठानमा सय शैय्याको कोरोना उपचार केन्द्र

हेल्थ टुडे,
धरान, ८ बैसाख : धरानस्थित बीपी कोइराला स्वास्थ्य विज्ञान प्रतिष्ठानमा १० आईसीयूसहितको १०० शैय्याको कोभिड–१९ उपचार केन्द्रको निर्माण कार्य तिव्र रुपले अगाडि बढेको छ । उपचार केन्द्र वैशाख १२ देखि सञ्चालनमा ल्याउने तयारी छ ।
कोरोना संक्रमितको संख्या भविश्यमा बढ्न सक्ने अनुमान गर्दै त्यसको जोखिमलाई ध्यानमा राखी आवश्यक उपकरणसहितको छुट्टै उपचार केन्द्र बनाउन लागिएको प्रतिष्ठानले जनाएको छ ।
प्रतिष्ठानका अनुसार यहाँ लेभल ३ को कोराना उपचार केन्द्र संचालन हुनेछ । सरकारले मेची अस्पताल र कोसी अस्पताललाई लेभल १ र २ सम्मको उपचार गर्ने केन्द्रका रूपमा अघि सारेको छ । थप संवेदनशील अवस्थामा पुगेका संक्रमितलाई प्रतिष्ठानमा उपचार गरिने उपकुलपति प्रा.डा. ज्ञानेन्द्र गिरीले बताए । उक्त केन्द्रको लागत १२ करोड ५० लाख रुपैयाँ छ । ‘निर्माणाधीन केन्द्रमा १० आईसीयू बेड जडानका लागि डिजाइनअनुसार काम भइरहेको छ । आगामी वैशाख १२ देखि सञ्चालनमा ल्याइने छ ।’ गिरीले भने । उनका अनुसार यहाँ सिटिस्क्यान, एमआरआई, अप्रेसन थिएटर, प्रयोगशाला र एक्सरे मेसिनहरू जडान गरिनेछन ।
चार वर्षअघि ७ करोड रुपैयाँमा लागतमा निर्मित द्वन्द्वपीडित पुनःस्थापना केन्द्रको भवनलाई कोरोना उपचारमा प्रयोगमा ल्याइन लागेको हो । उक्त भवन प्रतिष्ठानको हाडजोर्नी विभाग मातहत थियो ।
कोरोना उपचार केन्द्र सञ्चालनमा ल्याउन तीव्र गतिमा काम भइरहेको अस्पताल निर्देशक प्रा।डा। गौरीशंकर साहले बताए । उनका अनुसार अहिले कोरोना उपचारलाई लक्षित गरी फिवर क्लिनिक, हेल्प डेस्क र २० बेडको आइसोलेसन वार्ड सञ्चालनमा छ ।