डा. ज्ञवालीलाई मानव अंग प्रत्यारोपण केन्द्रको निर्देशकमा नियुक्त गरेकोमा सरकरी चिकित्सकहरुको आपत्ति, निर्णय तत्काल सच्याउन माग

हेल्थ टुडे,
काठमाडौं, २८ बैसाख : सरकरी चिकित्सकहरुको संख्या सरकारी चिकित्सक संघ (गोदान( ले भक्तपुरस्थित शहिद धर्मभक्त राष्टिय प्रत्यारोपण केन्द्रको निर्देशकमा त्रिवि शिक्षण अस्पतालका मिर्गौला प्रत्यारोपण सर्जन डा.प्रेमराज ज्ञवालीलाई नियुक्त गरिएकोमा आपत्ति जनाएको छ । गोदानले आईतवार विज्ञप्ति जारी गर्दै नेपाल सरकारले मानव अंग प्रत्यारोपण विकास समिति गठन आदेश २०६८ मा स्वास्थ्य सेवाभित्रको चिकित्सक मात्र निर्देशक बन्न पाउने व्यवस्थालाई लत्याउदै कानून विपरित केन्द्रको निर्देशकमा शिक्षा मन्त्रालय मातहत सञ्चालित त्रिवि शिक्षण अस्पतालको चिकित्सक डा.ज्ञवालीलाई नियुक्त गरेको भन्दै आपत्ति जनाएको हो । सिमित सेवा सुविधाकाबीच देशका सबै भागमा हरबखत सरकारी चिकित्सकहरुलाई विगतमा स्वायत्तताका नाममा सरकारी अस्पतालहरुलाई प्रतिष्ठान बनाउँदै गलहत्याईएको र सरकारी स्वास्थ्य प्रतिष्ठानहरुमा उपकुलपति लगायत अन्य पदाधिकारी नियुक्त गर्दा नियम मिचेर सरकारी चिकित्सक ईतरबाट हुने गरेको घटनाबाट सरकारी चिक्तिसकको मनोबल कमजोर बनाउँदै आएको गोदानका अध्यक्ष डा. दीपेन्द्र पाण्डेले जारी गरेको विज्ञप्तिमा उल्लेख गरिएको छ । सरकारले फेरि नियम विपरित मानव अंग प्रत्यारोपण केन्द्रमा स्वास्थ्य सेवा बाहिरका चिकित्सकलाई नियुक्त गरेकोले त्यो निर्णय तत्काल सच्याउन गोदानले माग गरेको छ । बुधबार बसेको मन्त्रीपरिषद्ले स्वास्थ्य मन्त्री भानुक्त ढकालको सिफारिसमा मानव अंग प्रत्यारोपण केन्द्रको निर्देशकमा त्रिवि शिक्षण अस्पतालका मिर्गौला प्रत्यारोपण सर्जन डा. ज्ञवालीलाई नियुक्त गर्ने निर्णय गरेको थियो । त्यो भन्दा पहिले केन्द्रको निर्देशक प्रत्यारोपण सर्जन डा. पुकारचन्द्र श्रेष्ठ थिए ।