कोरोना भाइरसका कारण नेपालमा पहिलो मृत्यु, सिन्धुपाल्चोककी २९ बर्षिय महिलाको निधन

हेल्थ टुडे,

काठमाडौं, ३ जेठ: नेपालमा पहिलो पटक कोरोना भाइरस ( कोभिड १९ ) का कारण एक जना महिलाको मृत्यु भएको छ । सिन्धुपाल्चोक बाह्रेबिसेकी २९ वर्षीया महिलाको कोभिड १९ का कारण मृत्यु भएको स्वास्थ्य तथा जनसंख्या मन्त्रालयले आवश्यक अनुसन्धान पछि पुष्टि गरेको हो ।
ती महिलाको १० दिनअघि त्रिवि शिक्षण अस्पतालमा नर्मल डेलिभरी भएको थियो । आमाछोरा दुबैको स्वास्थ्य सामान्य थियो । बैसाख २३ गते भर्ना भएकी ती महिलाले २४ गते बच्चा जन्माएकी र २५ गते नवजात शिशु लगेर डिस्चार्ज भएर घर फर्किएकी थिइन ।
तर उनलाई ज्वरो र खोकी लाग्नुका साथै स्वासप्रश्वासमा समस्या आयो । बाह्रबिसे प्राथमिक स्वास्थ्य केन्द्रमा उपचार गराउदा पनि निको नभएपछि उनलाई थप उपचारका लागि धुलिखेल अस्पताल ल्याउने क्रममा बिहीबार राती बाटैमा उनको निधन भएको पाइएको छ ।
कोरोनासँग मिल्दोजुल्दो लक्षण देखिएको थाहा पाएपछि अस्पतालले उनको पीसीआर विधिबाट कोरोना परीक्षण गरेपछि रिपोर्ट पोजेटिभ आएको मन्त्रालयले जनाएको छ । धुलिखेल अस्पतालले रिपोर्टका बिषयमा स्वास्थ्य मन्त्रालयलाई जानकारी गराएपछि नमुना पुन परीक्षण गर्न टेकुको जनस्वास्थ्य प्रयोगशाला पठाइएको थियो । टेकुले पनि पोजेटिभ नै भएको प्रष्ट पारेपछि कोरोना कै कारण मृत्यु भएको भन्ने अवस्थामा मन्त्रालय पुगेको हो । मृत्युको खवर बाहिरिए पछि मन्त्रालयका कोभिड १९ कमाण्डर डा. गुणराज लोहनी र प्रमुख विशेषज्ञ डा. दीपेन्द्ररमण सिह धुलिखेल अस्पताल पुगेका थिए । त्यहाँ उनीहरुले सबैकुराको जानकारी लिएका थिए ।
डा. लोहनी र डा. सिंहको टोलीको रिपोर्टका आधारमा मन्त्रालयले उनको मृत्यु कोरोनाका कारण भएको घोषणा गरेको छ । मन्त्रालयले शनिबार साँझ विज्ञप्ति जारी गर्दै कोभिड १९ सँग सम्वन्धित थप परीक्षण पश्चात नेपालमा कोभिड १९ बाट मृत्युभएको पहिलो घटना भएको पुष्टि भएको जनाएको छ । माघ ९ गते पहिलो पटक कोरोना भाइरस देखिएको नेपालमा अहिलेसम्म संक्रमितको संख्या २८१ पुगेको छ । ती मध्ये ३६ जना निको भएर घर फर्किसकेका छन् ।