हेल्थ टुडे,
काठमाडौं, १६ असार : स्वास्थ्य तथा जनसंख्या वैज्ञानिकहरुको छैटौं राष्ट्रिय सम्मेलन यही असार २२ र २३ मा अनलाईन मार्फत हुने भएको छ । नेपाल स्वास्थ्य अनुसन्धान परिषद्ले चैत २८ देखि ३० सम्म सम्मेलन आयोजना गर्ने मिति तोकिसकिएको भए पनि कोरोना भाइरसको महामारीका कारण स्थगित गरिएको थियो । सम्मेलन स्थगित गर्नु भन्दा अनलाईन (भर्चुअल ) मार्फत गर्नु सान्दर्भिक हुने निश्षर्क परिषद्ले निकाले पछि कोरोना संक्रमणकै बेला सम्मेलन हुन लागेको हो ।
नेपाल स्वास्थ्य अनुसन्धान परिषद्का सदस्य सचिव डा. प्रदीप ज्ञवालीले सम्मेलन नगर्नु भन्दा भर्चुअल भए पनि गर्नु राम्रो हुने सल्लाह भएपछि सम्मेलन गर्न लागिएको बताए । डा. ज्ञवालीका अनुसार सम्मेलनमा ५० वटा अनुसन्धानमूलक प्रस्तुतिकरण कोरोना भाइरस सम्बन्धी र ५० वटा कोरोना बाहेक स्वास्थ्य र जनसंख्या सम्बन्धी अनुसन्धानमूलक प्रस्तुतिकरण गरिने छन् । स्वास्थ्य र जनसंख्याका क्षेत्रमा अध्ययन र कार्यरत अनुसन्धानकर्ताहरुलाई आफूले गरेका तथ्यपरक अनुसन्धानलाई नीति निर्माता समक्ष प्रस्तुत गर्ने अवसर प्रदान गरेर देशमा स्वास्थ्य अनुसन्धानलाई प्रोत्साहन गर्न सम्मेलन आयोजना हुदै आइरहेको परिषद्का वरिष्ठ अनुसन्धानविज्ञ डा. मेघराज धिमालले बताए । यस पटक भइरहेको सम्मेलन नेपाल स्वास्थ्य अनुसन्धान परिषद्को फेसबुक पेजबाट र युट्यूवबाट प्रत्यक्ष प्रशारण हुने छ । सम्मेलन बिहान ९ देखि साझ ५ बजेसम्म चल्ने छ ।
