हेल्थ टुडे,
काठमाडौं, ८ भदौ : राष्ट्रिय मानव अधिकार आयोगले कोरोना संक्रमितको उपचारमा संलग्न चिकित्सक एवं स्वास्थ्यकर्मीलाई दुर्व्यवहार नगर्न सबैलाई आग्रह गरेको छ । बानेश्वर मिलनचोकका स्थानिय टोल सुधार समितिको नाममा होस्टेलमा बसेका निजामती अस्पतालका चिकित्सक र स्वास्थ्यकर्मी माथि भएको दुव्यवहारको घटनाको सर्वत्र निन्दा भएपछि आयोगले विज्ञप्ति निकालेर त्यसको विरोध गरेको हो ।
आयोगका सचिव वेद भट्टराईले सोमबार विज्ञप्ति जारी गरी जनस्वस्थ्य सङ्कटको अवस्थामा स्वास्थ्यकर्मी, सुरक्षाकर्मी तथा अत्यावश्यक सेवा प्रदायकलाई सहयोग र प्रोत्साहन गर्नुपर्नेमा अभद्र र अमानवीय व्यवहार प्रदर्शन गरिनु अत्यन्त दुःखद् भएको बताएका छन् । यसप्रकारका दुर्व्यवहार तथा अमानवीय कार्यले जनस्वास्थ्यमा समेत नकारात्मक असर पर्नसक्ने प्रति सचेत हुन र उनीहरुप्रति सहयोग र सम्मानजनक व्यवहार गरी नागरिकको कर्तव्य पालना गर्न आयोगले आग्रह गरेको छ ।
यस्ता घटनाहरुको छानविन गरी दोषीउपर कानुनी कारवाही गर्न समेत आयोगले स्थानीय प्रशासनलाई आग्रह गरेको छ । उच्च मनोबलका साथ कार्य गर्नुपर्ने पेशाकर्मीहरुको मनोबल र प्रतिष्ठामा प्रत्यक्ष असर पर्ने प्रकृतिका कार्यको पुनरावृत्ति हुन नदिन आयोगले सरकारलाई अपिल गरेको छ । हालै चितवनमा कोरोना संक्रमित चितित्सकको घरबाहिर स्थानीयले कोरोना संक्रमितको घर भनी ब्यानर टाँस्न खोजेका थिए । कोरोना भाइरस रोकथाम तथा नियन्त्रणका लागि भएको बन्दाबन्दी तथा काठमाडौं उपत्यकालगायत विभिन्न जिल्लाहरुमा लागू गरिएको निषेधाज्ञाको अवस्थामा आयोगले अनुगमन गरिरहेको जनाएको छ । कोरोना भाइरसको महामारीका बेला अग्रभागमा उपचारमा खटिरहेका चिकित्सक र स्वास्थ्यकर्मीको मनोवल बढाउने काममा सरकारले ध्यान दिनु पर्ने आयोगले स्मरण गराएको छ ।
Leave a Reply