स्वास्थ्यमा चिकित्सक सचिव भएपछि चिकित्सक संघको माग पुरा भयो  : डा. कार्की

हेल्थ टुडे,
काठमाडौं, ४ साउन : सरकारले बिगत डेढ बर्षदेखि रिक्त राखेको स्वास्थ्य तथा जनसंख्या मन्त्रालयको सचिवमा मन्त्रालयका प्रमुख विशेषज्ञ डा. रोशन पोखरेललाई सोमबार नियुक्त गरेपछि नेपाल चिकित्सक संघले सरकारको उक्त निर्णयको स्वागत गरेको छ । नेपाल चिकित्सक संघका अध्यक्ष डा. लोचन कार्कीले संघले स्वास्थ्य तथा जनसंख्या मन्त्रालयका चिकित्सक सचिव नियुक्त गर्न बिगत डेढ वर्षदेखि माग गर्दै आइरहेको भए पनि बिगतको सरकारले बेवास्ता गरेको बताउदै वर्तमान सरकारले आफ्नो माग अनुसार चिकित्सक सचिव नियुक्त गरेकोमा संघको माग पुरा भएको बताए ।

स्वास्थ्य तथा जनसंख्या मन्त्रालय प्राविधिक मन्त्रालय भएको र त्यहाँ कार्यरत हजारौ चिकित्सक र बिशौं हजार स्वास्थ्यकर्मीको समस्या चिकित्सकले मात्र बुझ्ने र समस्या समाधानका लागि चिकित्सक नै नेतृत्वमा हुनु पर्ने संघले माग गर्दै आइरहेको थियो । बिगतको केपी ओली नेतृत्वको सरकारले मन्त्रालयमा प्रशासनिक र प्राविधिक गरि दुई जना सचिवको दरबन्दी स्थापना गरे पनि चिकित्सकलाई सचिव बनाउन आनाकानी गर्दै आइरहेको थियो । चार वर्ष पहिले सचिव नियुक्त भएकी डा. पुष्पा चौधरीसंगओली नेतृत्वको सरकारको खटपट भएपछि स्वास्थ्यबाट सरुवा गरेर पद नै नभएको प्रधानमन्त्री कार्यालय सरुवा गरेको थियो । गैरकानुनी सरुवाको विरुद डा. चौधरी अदालत गएपछि अदालतले डा. चौधरीलाई स्वास्थ्यमै फर्काइदिएको थियो ।

अदालतले स्वास्थ्यमा फर्काए पनि ओली नेतृत्वको सरकारले स्वास्थ्यमा प्रशासन तर्फका सचिव  पठाएर डा. चौधरीलाई काम गर्ने अधिकारबाट बन्चित गराएको थियो । त्यसपछि डा. चौधरीले डेढ वर्ष पहिले राजिनामा दिएर विश्व स्वास्थ्य संगठनको क्षेत्रिय कार्यालय नयाँ दिल्लीमा जागिर खान गएकी थिइन । त्यसपछि बाह्रौ तहका चिकित्सक हुदा हुदै पनि आफू अनुकुल चिकित्सक नभएकाले ओली नेतृत्वको सरकारले सचिव नियुक्त गर्न आनाकानी गर्दै आइरहेको थियो । ओली सरकारको बहिर्गमनपछि शेरबहादुर देउवा नेतृत्वको सरकार बनेपछि डा. पोखरेललाई सचिव नियुक्त गरेको हो ।