औषधिको रुपमा प्रयोग गर्न दिने गरी  गाँजा नियमन विधेयकको मस्यौदा मन्त्रिपरिषद्‍मा

हेल्थ टुडे,

काठमाडौँ, १२ फागुन : सरकारले गाँजालाई औषधिको रुपमा प्रयोग गर्न दिनेगरी कानुन निर्माणको तयारी अघि बढाएको छ । गृह मन्त्रालयले गाँजा तथा गाँजाजन्य पदार्थ (नियमन) विधेयक २०७८ मस्यौदा तयार गरी मन्त्रिपरिषद्‍मा पठाएको हो ।

मन्त्रालयले विधेयक तयार पारेर मंगलबार गृहमन्त्री बालकृष्ण खाँणले मन्त्रीस्तरीय निर्णय गरेर मन्त्रिपरिषद्को सैद्धान्तिक सहमतिका लागि पठाएको मन्त्रालयका उपसचिव गोकर्णप्रसाद उपाध्यायले जानकारी दिए । उनका अनुसार विधेयकमा गाँजाको उत्पादन, संकलन, विक्री वितरण र निकासी कसरी गर्ने र त्यसको नियमन गर्ने विषय समेटिएको छ ।

सो विधेयक लागू भए लागूऔषध नियन्त्रण ऐन २०३३ ले गाँजाको प्रयोगमा पूर्णरूपमा लगाएको बन्देज खुल्नेछ । ‘लागु औषध नियन्त्रण ऐन २०३३ ले गाँजाको प्रयोगमा पूर्णरूपमा लगाएको बन्देज यो विधेयक कानुन भएर आएपछि खुल्छ,’ उपसचिव उपाध्यायले भने ।   मन्त्रालयले केही दिन अघिमात्रै सार्वजनिक गरेको गृह प्रशासन सुधार कार्ययोजनामा गाँजाको औषधीय प्रयोगका लागि कार्यविधि तय गर्ने उल्लेख थियो । यो विधेयक कानुन बनेर आएपछि त्यसैमा टेकेर कार्यविधि बनाउने तयारी मन्त्रालयको छ । स्वास्थ्य सम्बन्धि विभिन्न देशमा गरिएका अनुसन्धानमा गाजामा औषधिय गुण रहेको देखिएको छ ।