हेल्थ टुडे,
काठमाडौँ, २६ फागुन : विश्व मिर्गौला दिवसको अवसरमा बिहीबार राजधानीमा आयोजना गरिएको चिकित्सक र मिर्गौला प्रत्यारोपित बिच भएको मैत्रीपूर्ण फुटबलमा दुबै टोलीले ३ – ३ गोलको बराबरी गरेका छन् । शहीद धर्मभक्त राष्ट्रिय प्रत्यारोपण केन्द्रको आयोजना तथा अंग प्रत्यारोपण समाज नेपाल र स्वास्थ्य अभियान नेपालको सह आयोजनामा भएको खेलामा चिकित्सक पक्षको टीममा स्वास्थ्य मन्त्री विरोध खतिवडा र शहरी विकास मन्त्री रामकुमारी झाक्री सहित चिकित्सक, कलाकार र पत्रकार सहभागी थिए भने प्रत्यारोपितको नेतृत्व झमक श्रेष्ठले गरेका थिए ।
विश्व मिर्गौला दिवसको अवसरमा आज दशरथ रंगशालामा भएको मैत्रीपूर्ण खेलमा दुबै टोलीले आक्रामक सुरुवात गरेका थिए । यद्धपी निर्धारित ९० को समयमा तीन तीन गोल भई बराबरीमा रोकिएको थियो । खेलमा पूर्व मुख्य सचिव लिलामणि पौडेल, स्वास्थ्य सचिव देवकुमारी गुरागाईं, स्वास्थ्य मन्त्रालयका प्रमुख विशेषज्ञ डा गुणराज लोहनी, प्रत्यारोपण केन्द्रका निर्देशक डा पुकारचन्द्र श्रेष्ठ सहित बरिष्ठ कलाकार मदनकृष्ण श्रेष्ठ, हरिवंश आचार्य लगायत सहभागि थिए ।
केन्द्रले हरेक वर्ष यस किसिमको फुटबल आयोजना गर्दै आइरहेको छ । प्रत्यारोपण गरेका व्यक्तिले पनि अरु व्यक्ति सरह जिवन यापन गर्न सक्छन भन्ने उत्प्रेरणा प्रदान गर्न खेल प्रतियोगिता आयोजना गर्ने गरिएको केन्द्रका निर्देशक डा. पुकारचन्द्र श्रेष्ठले बताए । फुटवल लगत्तै रंगशालाकै कभर्ड हलमा मिर्गौलाबारे अन्तरक्रिया कार्यक्रम कार्यक्रम राखिएको थियो । कार्यक्रममा स्वास्थ्य राज्यमन्त्री भवानी खापुङले खानपान जीवनशैलीका कारण मिर्गौला रोगको समस्या नियन्त्रणमा आउन नसकेको भन्दै यस तर्फ अब सबैको ध्यान जानुपर्ने बताए । उनले सरकारले मिर्गौलाका बिरामीका लागि आर्थिक तथा कानूनी रुपबाट सहयोग नै गरेको भन्दै थप आवश्यकता परेका कुराहरुलाई थप छलफलबाट टुंग्याउन सकिने बताए ।
कार्यक्रममा प्रत्यारोपण केन्द्रका निर्देशक डा श्रेष्ठले मिर्गौला उपचारमा सरकारको राम्रो सहयोग भएको भन्दै प्रशंसा गरे । उनले मिर्गौलाका बिरामीका लागि डायलासिस र प्रत्यारोपण निशुल्क गरिएको भन्दै डायलासिसका लागि लागि प्रत्येक वर्ष एक जना व्यक्तिका लागि साढे २ लाख रुपैयाँ र प्रत्यारोपणमा ५ लाख रुपैयाँ सरकारले खर्च गर्ने बताए । अंगदानका बिषयमा अझै चेतना बिस्तार हुन नसकेको बताउदै यसमा सबैको सहयोग हुनु पर्नेमा जोड दिए ।
Leave a Reply