हेल्थ टुडे
काठमाडौं, २२ चैत : मिर्गौला प्रत्यारोपणमा एकपछि अर्को सफलता प्राप्त गर्दै आइरहेको भक्तपुरस्थित शहीद धर्मभक्त राष्ट्रिय प्रत्यारोपण केन्द्रले कलेजो प्रत्यारोपणमा पनि फड्को मार्न थालेको छ । केन्द्रले दुई दिनको अन्तरातलमा दुई जनाको कलेजो प्रत्यारोपण गरेको छ । यही चैत्र २० र २१ गते गरी दुई जनाको कलेजो प्रत्यारोपण गरिएको केन्द्रका कार्यकारी निर्देशक समेत रहेका अंग प्रत्यारोपण सर्जन डा. पुकारचन्द्र श्रेष्ठले बताए । उक्त शल्यक्रियामा नेपाली टोलीको नेतृत्व प्रत्यारोपण सर्जन डा.श्रेष्ठले गरेका थिए भने भारतको दिल्ली स्थित म्याक्स हस्पिटलका टोलिको नेतृत्व डा. शलिन अग्रवालले गरेका थिए ।
किर्तिपुरका ४६ वर्षिय इच्छा कुमार महर्जनलाई उनका उनकी श्रीमती ४३ वर्षिय ज्ञानी शोभा महर्जनले कलेजो दान दिएका थिए भने झापाका ५१ वर्षिय रामचन्द्र वलीलाई उनीकी १९ वर्षिय छोरी सुमित्रा वलीले कलेजो दिएका थिए । प्रत्यारोपण टीममा नेपाली टोलिमा सर्जनहरु डा. प्रदेज सापकोटा, डा क्षेतेन योञ्जन तामाङ्ग, डा अनिषा तिवारी, डा ललित कुमार दास, कलेजो फिजिसियन डा कर्ण राजवंशी, एनेस्थेसिया तथा क्रिटिकल केयरमा डा आरती राई, डा निभा श्रेष्ठ, डा रेखा श्रेष्ठ, डा रश्मीत श्रेष्ठ, डा शिवसुन्दर राजचल, डा सुमन थिए भने रेडियोलोजि विभागको नेतृत्व डा कृष्ण बुढाथोकीले गरेको थिए । त्यस्तै कोपिला दाहालको नेतृत्वको नर्सिङ्ग टोलिमा बबिता लवजु, अनिता कार्की, लगायतले सघाएका थिए ।
हाल प्रत्यारोपण गरिएका दुबै जना कलेजो प्रत्यारोपित तथा अंगदाताहरुको स्वास्थ्य सामान्य रहेको छ । जटिल शल्यक्रिको लागि अत्याधुनिक सुविधाले सम्पन्न यस केन्दमा न्यूनतम शुल्कमा कलेजो प्रत्यारोपण हुने गरेको छ र आगामी महिना देखि मासिक २ जनाको कलेजो प्रत्यारोपण नियमित गर्ने तयारी गरेको छ । सेवाको उपलब्धता सँगै देशमा मृर्गौला प्रत्यारोपण निःशुल्क गरिए झैं कलेजो प्रत्यारोपणमा पनि सहुलियत प्राप्त भएमा यस सेवाबाट धेरै जना कलेजो फेल भएका व्यक्तिहरु लाभान्वित हुने विश्वास गरिएको छ । शहीद धर्मभक्त राष्ट्रिय प्रत्यारोपणले नेपालमै पहिलो पटक विसं २०७२ मंशीरमा कलेजो प्रत्यारोपण गरेको थियो । केन्द्रले हाल सम्म ८ जनाको कलेजो प्रत्यारोपण गरेको छ । डा. श्रेष्ठका अनुसार ८ जनाको कलेजो प्रत्यारोपण गरिएकोमा ७ जना स्वस्थ्य व्यक्तिबाट र १ जना मस्तिष्क मृत्यू भएको व्यक्तिबाट कलेजो दान भएको थियो ।
Leave a Reply