अब हेटौडा अस्पतालमा पनि मिर्गौला प्रत्यारोपण हुने

हेल्थ टुडे,
काठमाडौं, २० मंसिर : अब हेटौडा अस्पतालमा पनि मिर्गौला प्रत्यारापण सेवा सुरुवात हुने भएको छ । भक्तपुरस्थित शहिद धर्मभक्त राष्ट्रिय प्रत्यारोपण केन्दको अगुवाइमा मिर्गौला प्रत्यारोपण सेवा प्रारम्भ हुने छ । बाग्मती प्रदेशका मुख्य मन्त्री राजेन्द्र पाण्डेको उपस्थितिमा मंसिर २० गते शहिद धर्मभक्त राष्ट्रिय प्रत्यारोपण केन्द्र र मदन भण्डारी स्वास्थ्य विज्ञान प्रतिष्ठान, हेटौडा अस्पतालबिच आर्थिक वर्ष २०७९÷८० भित्रे प्रत्यारोपण सेवा प्रारम्भ गर्न सम्झौता भएको छ ।
सम्झौतापत्रमा शहिद धर्मभक्त राष्ट्रिय प्रत्यारोपण केन्द्रका कार्यकारी निर्देशक समेत रहेका मिर्गौला प्रत्यारोपण सर्जन डा. पुकारचन्द्र श्रेष्ठ र मदन भण्डारी स्वास्थ्य विज्ञान प्रतिष्ठान, हेटौडा अस्पतालका अधिकारीले हस्ताक्षर गरेका छन् । कार्यक्रममा बाग्मती प्रदेशका मुख्य मन्त्री पाण्डे र नेपाल उद्योग वाणिज्य महासंघका पुर्व अध्यक्ष कुशकुमार जोशीको पनि उपस्थिति थियो । केन्द्रले देशका सात वटै प्रदेशमा मिर्गौला प्रत्यारोपण सेवा र डायलासिस सेवा बिस्तार गर्ने योजना अनुसार गण्डकी प्रदेशमा प्रत्यारोपण सेवा सुरु गरिसकेको छ भने कर्णाली प्रदेशको सुर्खेत र सुदूरपश्चिम प्रदेशको धनगढीमा पनि एक वर्षभित्र प्रत्यारोपण सेवा प्रारम्भ गर्ने गरि सम्झौता गरेर काम अगाडि बढाएको छ ।
शहीद धर्मभक्त राष्ट्रिय प्रत्यारोपण केन्द्रका कार्यकारी निर्देशक डा. श्रेष्ठले मिर्गौला प्रत्यारोपणका लागि यो वर्ष महत्वपूर्ण हुने बताउदै सबैको सहयोगमा केन्द्रको योजना सफल हुने विश्वास व्यक्त गरेका छन् ।