भोजपुरका जनस्वास्थ्य निरिक्षक सुन्दासलाई २०२२ को निक साइमन अवार्ड

हेल्थ टुडे,
काठमाडौं, ८ चैत : भोजपुरको मानेडाँडा आधारभुत अस्पतालका जनस्वास्थ्य निरिक्षक हेमन्त सुन्दासलाई सन् २०२२ को निक साइमन्स अवार्ड प्रदान गरिएको छ । स्वास्थ्य तथा जनसंख्या मन्त्रालय, राष्ट्रिय स्वास्थ्य तालिम केन्द्रको सहकार्यमा निक साइमन्स इन्टिच्युटले नेपालको ग्रामिण क्षेत्रमा बसेर उत्कृष्ठ स्वास्थ्य सेवा प्रदान गर्ने स्वास्थ्यकर्मीलाई हरेक वर्ष एक जना स्वास्थ्यकर्मीलाई निक साइमन्स अवार्ड प्रदान गर्दै आइरहेको छ ।
निक साइमन्सले राजधानीमा आयोजना गरेको ११ औं ग्रामिण स्वास्थ्यकर्मी सम्मेलनमा सुन्दासलाई जिम साइमन्स र मेरिलिन साइमन्सले उक्त अवार्ड प्रदान गरेका हुन् ।
देशभरिबाट सिफारिस भएका ६६ जना स्वास्थ्यकर्मी मध्ये उनीहरुले ग्रामिण क्षेत्रमा गरेको उत्कृष्ठ स्वास्थ्य सेवाको स्थलगत अनुगमन र मूल्यांकनका आधारमा उत्कृष्ठ सातको छनौट गरिएको थियो । उत्कृष्ठ सातबाट एक जनालाई उत्कृष्ठ ग्रामिण स्वास्थ्यकर्मी छनौट गरिएको छनौट समितिका सदस्य नवराज श्रेष्ठले जानकारी दिए । सम्मेलनका अवसरमा उत्कृष्ठ स्वास्थ्य सेवा प्रदान गरेका १३ जना सस्थ्यकर्मीलाई पनि सम्मान गरिएको थियो ।
कार्यक्रममा निक साइमन्स इन्स्टिच्युटका कार्यकारी निर्देशक डा. अर्चना अमात्यले ग्रामिण क्षेत्रमा रहेर उत्कृष्ठ स्वास्थ्य सेवा प्रदान गर्ने स्वास्थ्यकर्मीलाई हौसला प्रदान गर्दै उहाँहरुले सिकेका सिप र अनुभवलाई अरु समक्ष बाढ्न सम्मेलनसँगै अवार्ड कार्यक्रम आयोजना गरिदै आएको बताइन । ग्रामिण क्षेत्रका स्वास्थ्य समस्या उजागर गर्न र तिनको समाधानका उपाय खोज्न सम्मेलन सफल हुने विश्वास डा. अमात्यले व्यक्त गरिन ।
स्वास्थ्य सेवा विभागका महानिर्देशक डा. दीपेन्द्ररमण सिंहले ग्रामिण क्षेत्रमा गुणस्तरीय स्वास्थ्य सेवा प्रदान गर्न र स्वास्थ्यकर्मीलाई प्रोत्साहन गर्न निक साइमन्सले गरिरहेको योगदान स्मरणीय रहेको बताए । निक साइमन्सका अध्यक्ष विद्याधर मल्लिकले देशका विकट स्थानमा निक साइमन्सले स्वास्थ्यकर्मी पठाएर सरकारलाई सहयोग गरिरहेको बताए । बुधबारबाट सुरु भएको सम्मेलन तिन दिनसम्म चल्ने छ । सम्मेलनमा सात वटै प्रदेशका ग्रामिण क्षेत्रमा कार्यरत उत्कृष्ठ स्वास्थ्यकर्मीले भाग लिइरहेका छन् ।