स्वास्थ्य मन्त्री बस्नेतद्वारा ठोकर्पा आधारभुत अस्पतालको उद्घाटन

हेल्थ टुडे,
सिन्धुपाल्चोक, ४ जेठ : स्वास्थ्य तथा जनसंख्या मन्त्री मोहनबहादुर बस्नेतले सिन्धुपाल्चोकको सुनकोशी गाउँपालिका १ मा निर्माण भएको एक एक पाइला ठोकर्पा आधारभुत अस्पतालको उद्घाटन गरेका छन् । बिहीबार अस्पतालमा आयोजित भव्य कार्यक्रममा मन्त्री बस्नेतले सिलापत्र अनावरण गरेर अस्पतालको उद्घाटन गरेका हुन । १० शैय्याको उक्त अस्पताल सुनकोशी गाउँपालिका, एक एक पाइला, स्वास्थ्य मन्त्री बस्नेतको व्यक्तिगत आर्थिक सहयोग र नागरिक समाजका अन्य सहयोगीहरुको संयुक्त पहलबाट निर्माण सम्पन्न भएको हो । अस्पतालमा फार्मेसी, ल्याव, एक्सरे, दन्तसेवा, आँखा उपचार, बर्थिङ सेन्टर लगायतका सेवा उपलब्ध छन् ।
कार्यक्रममा बोल्दै स्वास्थ्य मन्त्री बस्नेतले ठोकर्पा आधारभुत अस्पताललाई नमुना अस्पतालको रुपमा विकास गर्न सबैको हातेमालो आवश्यक रहेकोमा जोड दिए । मन्त्री बस्नेतकै पहलमा यो अस्पतालमा अक्सिजन प्लान्ट स्थापना गरिएको र दैनिक ४५ सिलिन्डर अक्सिजन उत्पादन भइरहेको अस्पताल विकास समितिका अध्यक्ष नेत्र कार्कीले जानकारी दिए । ३ करोड ८३ लाख रुपैया लागतमा निर्माण भएको अस्पतालले आउदो साउन १ गतेदेखि २४ सै घण्टा इमरजेन्सी सेवा सुरु गर्न लागिएको अस्पताल प्रमुख डा. विनोद रानामगरले बताए । कार्यक्रममा सुनकोशी गाउँपालिका पूर्व अध्यक्ष श्रवण जिसी र वर्तमान गाउँपालिका अध्यक्ष टपेन्द्र तिमल्सिनाले गाउँको विकासका लागि मिलेर अगाडि बढ्ने बताए । कार्यक्रममा मन्त्री बस्नेतले अस्पताल निर्माणमा सहयोग गर्ने दाताहरुलाई सम्मान गरेका थिए ।