हेल्थ टुडे,
काठमाडौं, १० जेठ : शिक्षा, विज्ञान तथा प्रविधि मन्त्री अशोक राईले वृहत यौनिकता शिक्षालाई समय अनुकूल पाठ्यक्रममा समावेश गर्ने बताएका छन् । यूएनएफपीए एवं नेपाल परिवार नियोजन संघ सहित विभिन्न गैरसरकारी संस्थाहरुको सहयोगमा शिक्षा, विज्ञान तथा प्रविधि मन्त्रालय र स्वास्थ्य तथा जनसंख्या मन्त्रालयको संयुक्त आयोजनामा बुधबारदेखि राजधानीमा सुरु भएको दुई दिवसिय वृहत यौनिकता शिक्षा सम्बन्धि राष्ट्रिय सम्मेलनको उद्घाटन समारोहमा मन्त्री राईले समयको माग अनुसार पाठ्यक्रममा पनि यौनिकता शिक्षाको बिषयबस्तु हेरफेर गरिने बताएका हुन् । मन्त्री राईले सरकारले वृहत यौनिकता शिक्षाको महत्व र आवश्यकतालाई महसूस गरेरै पाठ्यक्रममा यौनिकता शिक्षालाई महत्वका साथ समावेश गरेको प्रष्ठ पार्दै बिषयबस्तु अपुरो र अधुरो भए सरोकारवालाको सल्लाह अनुसार परिवर्तन गर्न सरकार तयार रहेको बताए ।
सम्मेलनको उद्घाटन समारोहमा बोल्दै स्वास्थ्य सेवा विभागका महानिर्देशक डा. दीपेन्द्ररमण सिंहले यौनिकता शिक्षासँगै उनीहरुका लागि सहज ढंगले परिवार नियोजनका सेवा उपलब्ध हुनु पर्नेमा जोड दिदै स्वास्थ्य मन्त्रालयले यस क्षेत्रमा काम गरिरहेको बताए । स्वास्थ्य र शिक्षा एक अर्कामा जोडिएको बिषय भएको बताउदै डा. सिंहले दुबै मन्त्रालयको सहकार्यमा सम्मेलन हुनु र यसबाट प्राप्त सुझाव भविश्यका लागि मार्गदर्शन हुनेमा विश्वास व्यक्त गरे ।
कार्यक्रममा युएनएफपीएकी नेपाल प्रतिनिधि यङ होङले शिक्षा र स्वास्थ्य नै नयाँ पुस्ताको लागि परिवर्तनको आधार स्तम्भ भएको बताउदै राज्यले शिक्षामा लगानी बढाउनु पर्ने सुझाव दिइन । यौनिकता शिक्षा सबैका लागि उत्तिकै आवश्यक भएकोले राज्य यस बिषयमा संवेदनशिल भएर लाग्नु पर्नेमा होङले जोड दिइन ।
नेपाल परिवार नियोजन संघका अध्यक्ष हिमाल कसजूले नेपालमा पहिलाृे पटक वृतह यौनिकता शिक्षा सम्बन्धि राष्टिय सम्मेलन हुनु खुशीको कुरा भएको बताए । संघले यौनिकताको बिषयमा पैरवी गर्दा लखेटिनु पर्ने अवस्था समेत आएको बिगत स्मरण गर्दै अहिले वृहत यौनिकताका बिषयमा किशोर किशोरीसँगै बसेर छलफल गर्न पाउदा आफूहरुले सुरु गरेको अभियानले सफलता पाउन थालेको महसूस भएको बताए । कार्यक्रममा शिक्षा सचिव रामकृष्ण सुवेदी, सहसचिव हरि लम्साल लगायतले वृतह यौनिकता शिक्षाको महत्वमाथि प्रकाश पारेका थिए । सम्मेलन भोलीसम्म चल्ने छ
यौनिकता शिक्षालाई समय अनुकूल पाठ्यक्रममा समावेश गर्छौ : शिक्षा मन्त्री
![यौनिकता शिक्षालाई समय अनुकूल पाठ्यक्रममा समावेश गर्छौ : शिक्षा मन्त्री](https://healthtodaynepal.com/wp-content/uploads/2023/05/a-jamuna-si-16835737328_n-940x704.jpg)
Leave a Reply