ईसान बाल तथा महिला अस्पतालले मनायो २८ औं वार्षिकोत्सव

हेल्थ टुडे,
काडमाडौं, २० भदौ नेपालकै निजी क्षेत्रको पहिलो बाल अस्पतालका रुपमा मात्र नभई गुणस्तरीय उपचारमा पनि ख्याति कमाएको ईसान बाल तथा महिला अस्पतालले स्थापनाको २८औं वार्षिकोत्सव मनाएको छ । टोखा ५ स्थित अस्पतालमा बुधबार आयोजित कार्यक्रममा अस्पताल व्यवस्थापन समितिका अध्यक्ष प्रा.डा.रमेशप्रसाद सिंह, कार्यकारी निर्देशक प्रा. डा. आरपी चौधरी सहित अस्पताल सञ्चालक, चिकित्सक, कर्मचारी र शुभचिन्तकमाझ केक काटेर वार्षिकोत्सवको खुशीयाली साटासाट गरिएको हो । समारोहमा बोल्दै अस्पताल व्यवस्थापन समितिका अध्यक्ष अध्यक्ष प्रा.डा.रमेशप्रसाद सिंहले ईसान बाल तथा महिला अस्पतालको प्रमुख उद्देश्य नेपालमै अन्तर्राष्ट्रिय स्तरको गुणस्तरीय उपचार सेवा प्रदान गर्नु रहेको बताउँदै अस्पतालले आफ्नो उद्देश्य अनुसार अगाडि बढिरहेको बताए । संस्थापक भिष्म श्रेष्ठ र अजित नारायणले अस्पताललाई अहिलेको अवस्थामा पुर्याउनमा कार्यरत चिकित्सक, स्वास्थ्यकर्मी र कर्मचारीहरुको उत्तिकै योगदान रहेको बताउदै निष्ठावान सेवा नै अस्पताल स्थापनाको मूल उद्देश्य रहेको स्मरण गरे । अस्पतालका कार्यकारी निर्देशक एवं मेडिकल डाइरेक्टर प्रा. डा. आरपी चौधरीले अस्पतालमा २४ घण्टा नै एमडी पेडियाट्रिक विशेषज्ञहरुबाट पेडियाट्रिक मेडिसिन, नवजात तथा बाल सर्जरी, आकस्मिक सेवाका साथै महिला तथा प्रसूति सेवा उपलब्ध रहेको जानकारी गराउदै अस्पतालले नयाँ भवन बनाएर सेवा सुरु गरेपछि उपचार सेवाको स्तरमा पनि सुधार भएको बताए । ईसान बाल अस्पताल र थाइल्याण्डको समितिभेज अस्पतालबिच छिट्टै पारस्पिरिक सम्बन्ध कायम हुने बताउदै अस्पताललाई चाडै १०० शैयाको रुपमा बिस्तार गरिने जानकारी दिए । अस्पताल सञ्चालक समितिले यही साउन देखि लागु हुनेगरि अस्पतालमा कार्यरत चिकित्सक र कर्मचारीको तलब बढाएको समेत डा. चोधरीले जानकारी दिए ।
समारोहमा अस्पतालका संस्थापक अध्यक्ष स्वर्गिय डा. नारायण बहादुर थापाको स्मरणमा स्थापना गरिएको अवार्डबाट ३ जना कर्मचारीलाई पुरस्कृत गरिएको थियो । स्वर्गिय थापाकी पत्नी जनथापा क्षेत्रीले उक्त अवार्ड अस्पतालका जेष्ठ कर्मचारीहरु जितबहादुर कार्की, नारायण प्रसाद र सुनिता देउरालाई प्रदान गरेकी थिइन । कार्यक्रमको अवसरमा चित्रकला प्रतियोगितामा उत्कृष्ठ भएका बालबालिकाहरुलाई पनि पुरस्कार प्रदान गरिएको थियो । बिसं २०५२ सालमा १५ शैयाबाट कृष्णजन्माष्टमीको दिन स्थापना भएको ईसान बाल तथा महिला अस्पतालमा ८० जना विभिन्न विधाका बालरोग विज्ञहरुले सेवा प्रदान गरिरहेका छन् । अस्पतालले चाडै १०० शैयाको क्षमता सहित सेवा बिस्तार गर्ने योजना बनाएको जनाएको छ ।